Transshekaralyq sýlar boıynsha úkimetaralyq kelisimderdi jetildirý kerek – Álıhan Smaıylov
ASTANA. QazAqparat – Búgin Úkimet otyrysynda QR Premer-Mınıstri Álıhan Smaıylov Ekologııa mınıstrligine transshekaralyq sý máselesine qatysty tapsyrma berdi, dep habarlaıdy QazAqparat tilshisi.
«Elimizdiń azyq-túlik qaýipsizdigi aýyl sharýashylyǵyna qajet sýdyń jetkilikti bolýyna tikeleı baılanysty. Búginde qajet sý kóleminiń jartysynan kóbi agrarlyq sektorǵa tıesili. Degenmen, aýyl sharýashylyǵyn sýmen qamtamasyz etý sý tapshylyǵyna baılanysty jyl ótken saıyn qıyndap keledi. Buǵan birneshe faktor áser etip otyr. Birinshiden, kórshi elderdiń aýmaǵynan keletin sýǵa táýeldimiz. Ekinshi faktor – bizdiń óńirde sýdyń az jınalýy. Úshinshi – kanaldardaǵy sýdyń shyǵyny joǵary, sondaı-aq sýdy únemdeý tehnologııalary jetkiliksiz. Osyǵan qaramastan, qabyldanǵan sharalardyń nátıjesinde bıylǵy vegetatsııalyq kezeń qalypty jaǵdaıda ótti», - dedi Á. Smaıylov.
Osy oraıda Úkimet basshysy kórshi memleketterdiń sý qoımalarynan qosymsha sý kólemi jiberilgenin aıtty.
«Sondaı-aq, sýmen qamtamasyz etý nysandarynda tıisti tehnıkalyq jumystar júrgizildi. Bul jumysty ári qaraı jalǵastyryp, kelesi vegetatsııalyq kezeńge arnalǵan josparlardy bekitýdiń mańyzy zor. Birinshiden, qazirgi syn-qaterlerdi eskere otyryp, transshekaralyq sýlar boıynsha úkimetaralyq kelisimderdi jetildirý jumystaryn turaqty túrde júrgizý qajet. Ekologııa mınıstrligi múddeli memlekettik organdarmen birlesip, bul máseleni erekshe baqylaýda ustaýy kerek», - dedi Premer-Mınıstr.
