Transshekaralyq ózender salasyndaǵy kelissóz komıssııalaryna erekshe mártebe berilmek
NUR-SULTAN. QazAqparat - Transshekaralyq ózender salasyndaǵy Qazaqstannyń kelissóz komıssııalaryna erekshe mártebe berý máselesi qarastyrylýda. Bul jaıynda QR Premer-Mınıstri Asqar Mamınniń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Qazirgi ýaqytta respýblıkalyq menshiktegi sý sharýashylyǵy qurylystaryn basqarý jáne paıdalanýdyń jetkilikti tetigi jasalǵan. Ol «Qazaqstan Respýblıkasynyń Úkimeti týraly» Konstıtýtsııalyq zańynda anyqtalǵan. Sondaı-aq ýákiletti organnyń qyzmetine baqylaý jasaýdy qamtamasyz etedi. Jańa Ekologııalyq kodekstiń (budan ári – Ekokodeks) redaktsııasyna keshendi ekologııalyq ruqsat (budan ári – ruqsat) retinde qural engiziledi. Ruqsat eń úzdik qoljetimdi tehnıkalardy qoldaný esebimen beriledi. Ol bárinen buryn sýdy tutyný deńgeıin tómendetýdi nemese ekologııalyq tıimdilikti kóterý baǵdarlamasyn berýdi usynady«, - dedi Asqar Mamın.
Premer-Mınıstrdiń atap ótýinshe, sý qorynyń jerleri sheginde, sondaı-aq aýyz sýmen jabdyqtaý úshin paıdalanylatyn nemese paıdalanylýy múmkin jer asty sýlarynyń ýchaskelerinde jáne ken oryndary kontýrlarynda jer qoınaýyn paıdalaný boıynsha operatsııalardy ótkizýge tyıym salý Sý kodeksiniń 120, 125-baptarynda jáne Jer qoınaýy jáne jer qoınaýyn paıdalaný kodeksiniń 25-babynda qarastyrylǵan.
»Osyǵan sáıkes Ekokodekstiń jańa redaktsııasynda kórsetilgen tyıymǵa kiretin ýchaskeler úshin ekologııalyq talaptar kózdelgen. Sý únemdeý tehnologııalaryn engizý, bıýdjet qarajatyn tıimsiz josparlaý men paıdalaný úshin, sondaı-aq eldiń sý qaýipsizdigine qarsy qylmystar úshin jaýapkershilikti kúsheıtý jáne transshekaralyq ózender salasyndaǵy Qazaqstannyń kelissóz komıssııalaryna erekshe mártebe berý máseleleri de zańnamany jetildirý aıasynda qarastyrylady. Sondaı-aq memlekettik baǵdarlamada eskeriletin bolady«, - dedi Úkimet basshysy.
