Transshekaralyq ózender kelissózderinde komıssııa músheleriniń jıi ózgerýinen utylyp jatamyz - senator
NUR-SULTAN. QazAqparat – Senattyń jalpy otyrysynda QR Úkimetiniń jáne Respýblıkalyq bıýdjettiń atqarylýyn baqylaý jónindegi esep komıtetiniń 2020 jylǵy respýblıkalyq bıýdjettiń atqarylýy týraly esepterin talqylaý kezinde senator Aqylbek Kúrishbaev sý tapshylyǵy máselesin kóterdi, dep habarlaıdy QazAqparat tilshisi.
«Jaqyn bolashaqta elimizdiń qaýipsizdigine áser etetin basty qaterdiń biri – sý tapshylyǵy bolýy múmkin. Dúnıejúzilik bank sarapshylarynyń pikirinshe, 2030 jylǵa qaraı Qazaqstandaǵy sý resýrstarynyń kólemi 90-nan 76 km³ deıin tómendeıdi. Sonymen birge, sý sharýashylyǵy sektory ınfraqurylymynyń tozý kólemi 70%-dan asady. Nátıjesinde, respýblıkada sýarý júıesiniń paıdaly áser koeffıtsıenti tek qana 0,45-0,55, ıaǵnı sýdyń 40 paıyzy paıdalanylmaı ysyrap bolyp jatyr», - dedi A. Kúrishbaev.
Onyń aıtýynsha, qazirgi ýaqytta bizde aýyl sharýashylyǵy jerleriniń tek qana 4% zamanaýı tamshylatý tásilimen sýarylady, bul bar bolǵany 62 myń gektar.
«Biz jaqynda Túrkistan oblysynda Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń kóshpeli otyrysyn ótkizdik. Qazirdiń ózinde óńirdiń barlyq jerinde sýaratyn sýdyń tapshylyǵy qatty baıqalýda. Halyqaralyq sarapshylar atap ótkendeı, bizdiń basty problemamyz – sýdy josparlaý, baqylaý jáne paıdalaný júıesiniń tıimsizdiginde. ıAǵnı bizdiń elimizdegi sý daǵdarysy eń aldymen basqarýdaǵy daǵdarystyń saldarynan bolyp otyr. Birneshe mysal keltireıin. Sý resýrstary komıtetiniń ózinde qyzmetkerlerdiń kópshiliginiń salalyq jumys tájirıbesi joq, 38 adamnyń 18-i nemese tek 40%-y sý sharýashylyǵynyń mamandary. Jalpy «Qazsýshar» kásiporyn júıesinde qyzmetkerlerdiń tek jartysy ǵana tıisti kásibı bilimge ıe, olardyń kóbisi zeınetke deıingi jasta. 761 ózen, 529 kól, 71 sý qoımasy ornalasqan Balqash-Alakól basseındik ınspektsııasynda bar bolǵany 21 maman jumys isteıdi. Tórt oblystyń aýmaǵyn qamtıtyn Jaıyq-Kaspıı basseındik ınspektsııasynda qyzmetkerlerdiń jalpy sany – 12 ǵana adam», - dedi senator.
Onyń paıymynsha, bul salany ózgertý úshin elimizge sý únimdeý jáne tsıfrlyq tehnologııalardy meńgergen zamanaýı kadrlar kerek.
«Joǵary oqý oryndarynda sý mamandaryn daıarlaý sapasyn arttyrý, Jambyl gıdromelıoratıvtik ınstıtýtyn qalpyna keltirý, Qazaqstanda sý problemalary boıynsha álemdegi jetekshi ýnıversıtettiń fılıalyn ashý, sý sharýashylyǵy ǴZI-dyń jumysyn jandandyrý, bilimdi arttyrý jáne mamandardy qaıta daıarlaý jónindegi óńirlik ortalyqtardy qurý qajettiligi týraly kóptegen jyldar boıy aıtylyp keledi. Biraq bul máseleler búginge deıin sheshilmedi. Sý obektileriniń kópshiliginde qazirge deıin gıdrologııalyq beketter joq, sondyqtan biz elimizde qansha sý qory bar ekenin naqty bilmeımiz», - dedi depýtat.
«Transshekaralyq ózender týraly halyqaralyq kelissózderde biz ǵylymı negizdemelerimizdiń álsizdiginen jáne komıssııa músheleriniń jıi ózgerip otyrýynan utylyp jatamyz. Atap aıtqanda, osy baǵytta biz qytaılyq áriptesterimizden edáýir artta qalyp otyrmyz. Bul – bizdiń kórshilerimizben sý bólisý máselesinde álsiz tusymyzdyń biri. Osylaısha, elimizde strategııalyq mańyzy bar sý sharýashylyǵy salasyn kadrlyq jáne ǵylymı qamtamasyz etý máseleleri tolǵaǵy jetken suraqqa aınaldy», - dedi A. Kúrishbaev.
