Transshekaralyq básekelestik talabyn buzǵandarǵa aıyppul jańa tásilmen esepteledi

ASTANA. QazAqparat – Eýrazııalyq ekonomıkalyq komıssııa saıtynda transshekaralyq básekelestik erejelerin buzǵandarǵa salynatyn aıyppuldy esepteýdiń ınteraktıvti modýli paıda boldy, dep habarlaıdy QazAqparat tilshisi.

«Interaktıvti modýl nemese aıyppul kalkýlıatory transshekaralyq naryqtardaǵy básekelestik erejelerin buzǵany úshin salynatyn aıyppuldar týraly aqparatty onlaın rejımde alýǵa múmkindik beredi. Buǵan qosa, ol Eýrazııalyq ekonomıkalyq komıssııasynyń monopolııaǵa qarsy retteý departamenti joldaǵan saýaldarǵa naqty jaýap, málimet usynbaǵan jaǵdaıda salynatyn aıyppuldy esepteýge arnalǵan. Onlaın-aıyppul kalkýlıatoryn qoldaný óte ońaı. Aldymen, básekelestiktiń qandaı túri boıynsha talaptardyń buzylǵanyn tańdaý qajet. Keıin kalkýlıator esepteý kezinde barlyq jaǵdaılardy avtomatty túrde eskerip, aıyppul kólemin azaıtý nemese ulǵaıtý boıynsha sheshim qabyldaıdy», - delingen Eýrazııalyq ekonomıkalyq komıssııasynyń resmı saıtyndaǵy habarlamada.

EEK-niń básekelestik jáne monopolııaǵa qarsy retteý mınıstri Baqyt Sultanovtyń aıtýynsha, bul qural Eýrazııalyq ekonomıkalyq odaq elderiniń kásipkerleri, kásiporyn basshylary men qarapaıym azamattary úshin tıimdi bolmaq.

Aıta keteıik, joǵaryda kórsetilgen aıyppuldar transshekaralyq básekelestik naryǵyndaǵy ústemdigin paıdalanǵan nemese básekelestik talaptaryna kereǵar kelisimder jasaǵan, ýaqytly aqparat usynbaǵan bıznes ókilderi men kompanııalarǵa salynady.