Transshekaralyq týrıstik marshrýttar sheteldikter arasynda joǵary suranysqa ıe

ASTANA. KAZINFORM – Transshekaralyq týrıstik marshrýttar sheteldikter arasynda joǵary suranysqa ıe. Bul týraly Týrızm jáne sport mınıstrliginen málim etti.

«Altyn alań» jańa týrıstik marshrýty jobasy 2020 jyly Ózbekstan tarapynyń bastamasymen Almatyda tanystyrylǵan bolatyn. Jalpy transshekaralyq marshrýttardy damytý máselesi túrli alańdarda kóterilip, talqylanyp keledi. 2022 jyly Túrki memleketteri uıymynyń forýmynda joǵaryda kórsetilgen marshrýt boıynsha Tabarrýk-zıërat ónimin damytý jónindegi naqty is-sharalar jospary bekitildi», - dep atap ótti mınıstrlikten agenttiktiń resmı saýalyna oraı.

Vedomstvo málimetinshe, týrónimderdi damytý aıasynda ádette marshrýt aldymen jalpy belgilenip, damytý úshin qajetti sharalar qabyldanady. Keıinnen naqty suranysqa saı marshrýtqa ózgerister engizilýi múmkin nemese týroperatorlar marshrýttyń túrli bólikterin týrısterge usyna alady. 

«Transshekaralyq marshrýttardy, onyń ishinde joǵaryda kórsetilgen marshrýt boıynsha týrlardy qazirgi tańda birqatar týroperator usynady. Bul týrlar ásirese sheteldik týrıster arasynda joǵary suranysqa ıe. Qazaqstan jáne Ózbekstan arasyndaǵy transshekaralyq týrıstik marshrýtty damytý jáne ilgeriletý úshin aýqymdy jumys istelinip jatyr. Týroperatorlar bul baǵyttaǵy týrlardy belsendi túrde usynyp, týrısterdiń qyzyǵýshylyǵyn arttyrýda», - dedi mınıstrlikten. 

Aıta keteıik, «Altyn alań» jańa týrıstik poıyz marshrýty Astana, Almaty, Túrkistan, Otyrar, Taraz, Shymkent, Tashkent, Samarqand, Buhara jáne Hıýa qalalary arasynda qatynaıdy.