Transshekaralyq sýǵa qatysty kelissózderdi kúsheıtý úshin mańyzdy argýmentter qalyptastyrý qajet
ASTANA. KAZINORM — Búgin Úkimet otyrysynda 2024-2030 jyldarǵa arnalǵan sý resýrstaryn basqarý júıesin damytý tujyrymdamasy maquldandy.
«Jalpy sý resýrstaryn paıdalaný salasyndaǵy ǵylymı zertteýler júıesin jolǵa qoıý kerek. Mysaly, Ertis ózeniniń resýrsyn aýmaqtar arasynda qaıta bólýdi qarastyrýdyń mańyzy zor. Kelesi kezekte — transshekaralyq sýdy paıdalaný máselelerin sheshý. Kórshi memlekettermen osyndaı kelisimderdi ázirleý aıasynda kelissózder protsesterin kúsheıtý úshin mańyzdy argýmentter qalyptastyrý jaǵyna mán berilýi tıis», - dedi Úkimet basshysy Álıhan Smaıylov.
Premer-Mınıstrdiń paıymynsha, tujyrymdamada josparlanǵan barlyq is-sharany sapaly iske asyryp, oǵan jaýapkershilikpen qaraý elimizdegi sý resýrstaryn basqarýdyń tıimdiligin arttyrýǵa yqpal etedi.
«Sondyqtan Sý resýrstary mınıstrligi múddeli memlekettik organdarmen jáne óńir ákimdikterimen birge tujyrymdamany tıimdi iske asyrýdy qamtamasyz etýi qajet», - dedi Álıhan Smaıylov.
Osydan keıin Úkimet músheleri usynylǵan jobany maquldap daýys berdi.
