Transshekaralyq sýdy paıdalaný baǵytynda jańa kelisimder pysyqtalyp jatyr - mınıstrlik
ASTANA. KAZINFORM — QR Sý resýrstary jáne ırrıgatsııa mınıstrligi transshekaralyq sýdy paıdalaný máselelerin sheshý baǵytynda qandaı kelisimder jasalatynyn naqtylady.
«Qazaqstan Respýblıkasy transshekaralyq ózender boıynsha kórshiles eldermen sý salasynda yntymaqtastyqty nyǵaıtyp jatyr. Transshekaralyq ózenderge qatysty kórshiles eldermen ózara qarym-qatynas transshekaralyq sý nysyndaryn paıdalaný jáne qorǵaý boıynsha Kelisimdermen retteledi. Onyń aıasynda ár baǵyt boıynsha birlesken komıssııalar men jumys toptary qyzmet atqarady», - delingen mınıstrliktiń Kazinform agenttigine bergen jaýabynda.
Qazaqstan Respýblıkasy men Qytaı Halyq Respýblıkasy arasyndaǵy sýǵa qatysty máseleler 2001 jylǵy Transshekaralyq ózenderdi paıdalaný jáne qorǵaý salasyndaǵy yntymaqtastyq týraly úkimetaralyq kelisimmen retteledi. Munymen qosa, ózender basseınderine qatysty kelissózder 1992 jylǵy 18 aqpandaǵy «Memleketaralyq kózderdiń sý resýrstaryn paıdalanýdy jáne qorǵaýdy birlesip basqarý salasyndaǵy yntymaqtastyq týraly» Qazaqstan, Qyrǵyzstan, Ózbekstan, Tájikstan men Túrikmenstan arasyndaǵy kelisimmen retteledi.
Qyrǵyz Respýblıkasymen sý sharýashylyǵy boıynsha yntymaqtastyq 2000 jylǵy Shý jáne Talas ózenderindegi memleketaralyq paıdalanýdaǵy sý sharýashylyǵy nysandary týraly úkimetaralyq kelisim aıasynda júzege asady. Atap aıtqanda, Qazaqstan men Reseı arasyndaǵy sý máselesi 2010 jylǵy 7 qyrkúıektegi «Transshekaralyq sý obektilerin birlesip paıdalaný jáne qorǵaý týraly» kelisimmen (1992 jylǵy 27 tamyzdaǵy Kelisimniń ornyna) retteledi.
«Sonymen birge, qazirgi kezde Qazaqstan men Ózbekstan úkimetteri arasynda Transshekaralyq sý obektilerin birlesip basqarý jáne utymdy paıdalaný týraly jeke ekijaqty kelisimge qol qoıý máselesi pysyqtalyp jatyr. Búgingi kúni Kelisim jobasy mátininiń negizgi bóligi kelisildi. Kelisim jobasyna 2024 jyldyń ekinshi jartysynda qol qoıý josparlanǵan. Budan bólek, 2015 jyldan bastap transshekaralyq ózenderdi paıdalaný jáne qorǵaý boıynsha Qazaq-Qytaı birlesken komıssııasy aıasynda eki el arasyndaǵy transshekaralyq ózenderdegi sýdy bólý týraly kelisim jobasyn ázirleý ári ýaǵdalasý boıynsha arnaıy jumys tobynyń (AJT) qyzmeti júrip jatyr. AJT sheńberinde Qazaqstan men QHR arasyndaǵy transshekaralyq ózenderdiń sýyn bólý týraly kelisim jobasyn zerdeleý jáne kelisý jumystary jalǵasady», - dep atalyp ótken QR Sý resýrstary mınıstrligi aqparatynda.
