Transshekaralyq sý resýrstaryn basqarý boıynsha ortaq tásilder ázirlendi – Sý mınıstri
ASTANA. KAZINFORM — Qazaqstan men Ózbekstan transshekaralyq sý obektilerin birlesip basqarý jáne tıimdi paıdalaný týraly kelisimge qol qoıdy. Bul týraly Sý resýrstary jáne ırrıgatsııa mınıstrligi habarlady.
Prezıdent Qasym-Jomart Toqaevtyń Ózbekstanǵa memlekettik sapary aıasynda Qazaqstan men Ózbekstan arasyndaǵy Joǵary memleketaralyq keńestiń ekinshi otyrysy ótti. Otyrysta Sý resýrstary jáne ırrıgatsııa mınıstri Nurjan Nurjigitov pen Ózbekstan Sý sharýashylyǵy mınıstri Shavkat Hamraev transshekaralyq sý obektilerin birlesip basqarý jáne tıimdi paıdalaný jónindegi úkimetaralyq kelisimge qol qoıdy.
Kelisim eki eldiń turǵyndary men aýyl sharýashylyǵy aımaqtaryn sýmen qamtamasyz etetin transshekaralyq ózender men kanaldar boıynsha ózara árekettesý tetikterin bekitedi. Qujat transshekaralyq sý sharýashylyǵy nysandarynyń paıdalaný rejımin úılestirý, turaqty birlesken tekserýler júrgizý, olardyń senimdi jumysyn qamtamasyz etý jáne tótenshe jaǵdaılardyń aldyn alý sharalaryn qarastyrady.
Sonymen qatar transshekaralyq ýchaskelerde sý berý men alý derekterin avtomattandyrylǵan júıede birlesip esepke alý jáne aqparatty jedel almastyrý jóninde kelisimge qol jetkizildi. Júıeni engizý sý resýrstaryn baqylaýdy kúsheıtip, eki eldiń sý sharýashylyǵy organdary arasyndaǵy senimdi arttyrýǵa yqpal etedi.
Qujat sý sharýashylyǵy ınfraqurylymyn jańartý men jóndeýdi, sý shyǵynyn azaıtýdy, sý únemdeý tehnologııalaryn engizýdi jáne sýarmaly jerlerdiń melıoratıvtik jaǵdaıyn jaqsartýdy kózdeıdi. Sondaı-aq taraptar tasqyn, qurǵaqshylyq jáne basqa da tabıǵı qubylystardyń aldyn alý jáne saldaryn azaıtý boıynsha kúsh-jigerdi úılestiredi.
Kelisimdi iske asyrý úshin Qazaqstan men Ózbekstannyń Úkimetaralyq komıssııasy qurylady. Komıssııa kelisimderdiń oryndalýyn úılestiredi, transshekaralyq nysandardy paıdalaný boıynsha sheshimder qabyldaıdy, arnaıy jumys toptaryn qurady jáne eki eldiń quzyrly organdary arasyndaǵy dıalogty qamtamasyz etedi. Komıssııanyń otyrystary jylyna eki ret, kezekpen Qazaqstan men Ózbekstan aýmaǵynda ótkiziledi.
— Bul qujat — 2017 jyldan beri júrgizilip kele jatqan ortaq eńbektiń nátıjesi. Eki memlekettiń júıeli qadamdarynyń arqasynda transshekaralyq sýdy basqarý boıynsha kelisilgen tásilder ázirleý múmkin boldy. Sondyqtan búgin qol qoıylǵan kelisim tarıhı mánge ıe oqıǵa bolyp otyr. Jańa kelisim Qazaqstan men Ózbekstannyń qoldanystaǵy halyqaralyq mindettemelerine negizdeledi. Sonyń ishinde 1992 jylǵy 18 aqpandaǵy Ortalyq Azııa elderi arasyndaǵy transshekaralyq sý resýrstaryn birlesip basqarý, paıdalaný jáne qorǵaý salasyndaǵy yntymaqtastyq týraly kelisim, sondaı-aq Transshekaralyq sý aǵyndary men halyqaralyq kólderdi qorǵaý jáne paıdalaný jónindegi BUU konventsııasy jáne Halyqaralyq sý aǵyndaryn keme qatynasynan basqasha paıdalaný túrleriniń quqyǵy týraly konventsııany qamtıdy. Bul kelisim Qazaqstan men Ózbekstan arasyndaǵy senimdi nyǵaıtyp, shekaralas aımaqtardyń sý qaýipsizdigin arttyrady, aýyl sharýashylyǵynyń damýyna járdemdesedi jáne ekologııalyq turaqtylyq negizin kúsheıtedi. Qujat Ortalyq Azııadaǵy sý dıplomatııasyn damytýǵa eleýli úles qosady, — dep atap ótti Sý resýrstary jáne ırrıgatsııa mınıstri Nurjan Nurjigitov.
Aıta ketelik Toqaev eki el úkimetine sý sharýashylyǵy saıasatyndaǵy tásilderdi úılestirý úshin júıeli sharalar ázirleýdi usynǵan edi.