Transshekaralyq ózender men Kaspıı teńiziniń jaǵdaıyna basa nazar aýdarý kerek – Toqaev
ASTANA. KAZINFORM – Qasym-Jomart Toqaev ekinshi «Ortalyq Azııa – Reseı» sammıtinde sóılegen sózinde Kaspııdiń sý resýrstaryn saqtaý boıynsha memleketaralyq baǵdarlamany iske asyrýdyń mańyzyna toqtaldy. Bul týraly Aqordanyń baspasóz qyzmeti habarlady.
Qasym-Jomart Toqaev jasandy ıntellekt tehnologııalaryn engizý arqyly tsıfrlyq transformatsııa júrgizý ózekti mindetke aınalǵanyna toqtaldy. Sondaı-aq Qazaqstan bul salada keshendi jumys júrgizip jatqanyna mán berdi.
– Jaqynda ǵana Astanada Halyqaralyq jasandy ıntellekt ortalyǵy ashyldy. Ol álemdik kompanııalarmen, sonyń ishinde reseılik kásiporyndarmen seriktestik ornata otyryp, otandyq ázirlemelerdiń birtutas ekojúıesin qurýdy kózdeıdi. Sonymen qatar ulttyq sýperkompıýter iske qosyldy. Ekinshi sýperkompıýterdiń jumysyn jolǵa qoıý mindeti júkteldi. 400 myńnan astam stýdentti qamtıtyn arnaýly memlekettik baǵdarlama júzege asyrylyp jatyr. Jasandy ıntellekt salasyndaǵy zertteý ýnıversıtetin ashý jumystary bastalyp ketti. Biz tájirıbe almasýǵa, ózara taǵylymdamalar ótkizýge, zertteý jobalaryna jáne basqa da birlesken bastamalarǵa qatysýǵa daıynbyz. Ǵylymı jáne óndiristik ınnovatsııa boıynsha álemdik kóshbasshylardyń biri sanalatyn Reseımen uzaq merzimdi ári nátıjeli yntymaqtastyq ornatýǵa erekshe qyzyǵýshylyq tanytamyz. Sondaı-aq muny ekijaqty yqpaldastyqtyń basym baǵyty retinde qarastyramyz, - dedi Prezıdent.
Memleket basshysynyń aıtýynsha, aımaq elderi buryn-sońdy bolmaǵan ekologııalyq syn-qaterlermen betpe-bet kelip otyr. Ony eńserý úshin úkimetter men salalyq vedomstvolar basshylary deńgeıinde júıeli sharalar qabyldaý qajet.
– Osyǵan oraı Ekologııa máseleleri jónindegi Reseı jáne Ortalyq Azııa elderiniń mınıstrler keńesin bekitýdi usynamyz. Transshekaralyq ózender men Kaspıı teńiziniń jaǵdaıyna basa nazar aýdarý kerek. Bul kúrdeli máseleni sheshýge Kaspııdiń sý resýrstaryn saqtaý boıynsha memleketaralyq baǵdarlamasyn iske asyrý yqpal etedi. Sý qaýipsizdiginiń qazirgi jaǵdaıy da alańdatpaı turmaıdy. Sý resýrstary men aýyl sharýashylyǵy jerleriniń jaı-kúıin baqylaý, sondaı-aq tótenshe jaǵdaılardy boljaý úshin jasandy jer serikterin paıdalana otyryp ǵaryshtyq monıtorıng boıynsha birlesken baǵdarlama jasaqtaýdy jáne iske asyrýdy usynamyz, – dedi Qasym-Jomart Toqaev.