Transshekara sýlaryna qatysty kelissózderdi súıemeldeý jónindegi departament qurylady

ASTANA. QazAqparat – Transshekaralyq sý máselesine qatysty kelissózderdi súıemeldeý jónindegi arnaýly departament qurylady. Májilis depýtattarynyń dál osy saýalyna Premer-Mınıstr Álıhan Smaıylov jaýap berdi, dep habarlaıdy QazAqparat tilshisi.

«Qazirgi ýaqytta Memleket basshysynyń 2019 jyldyń 17 maýsymyndaǵy Jarlyǵymen qurylǵan Ekologııa jáne tabıǵı resýrstar mınıstrligi ózine júktelgen sý resýrstaryn basqarý qyzmetin oryndaıdy. Mınıstrlik júıesinde bul máselege qatysty negizgi jumysty Sý resýrstary jónindegi komıtet, onyń basseındik ınspektsııalary men transshekaralyq ózender departamenti júrgizedi. Úkimet sý resýrstaryn basqarý jónindegi jeke memlekettik organ qurý týraly usynysty saralaı kele, mınıstrliktiń qoldanystaǵy ókilettik kólemi sý resýrstaryn basqarý salasyn keshendi retteýdi qamtamasyz etedi dep sanaıdy. Sondyqtan qazirgi ýaqytta jeke memlekettik organ qurýǵa erte», - dep atap ótedi Úkimet basshysy jaýabynda.

Degenmen, Premer-Mınıstr sý resýrstaryn tıimdi qorǵaý jáne paıdalaný boıynsha tapsyrmalardy, memleketaralyq sý qarym-qatynasyn qalyptastyrýdaǵy saıasattyń keleshegin eskere otyryp, ókiletti organnyń shtat sanyn ulǵaıtý máselesi pysyqtalyp jatqanyn atap ótedi.

«Sonymen qatar Memleket basshysynyń tapsyrmasyn eskere otyryp, ortalyq deńgeıdegi is basyndaǵy bólimshelerdi kúsheıtiledi jáne kelissózderdi súıemeldeý jónindegi arnaýly departament qurylady. Osylaısha, sý resýrstaryn basqarýdyń barynsha tutas júıesi qalyptastyrylady», - dedi Álıhan Smaıylov.