Transport salasyna 770 grant bólindi: Qandaı mamandar tapshy

ASTANA. KAZINFORM – Búgin qazaqstandyqtar Kólik qyzmetkerleri kúnin ekinshi ret atap ótedi. Merekeni bıyl 772 707 maman toılap jatyr. Elimizde bul sala qalaı damyp keledi? Qazaqstanda qandaı transport qyzmetkerleri tapshy? Kazinform tilshisi anyqtap kórdi.

– Sońǵy bes jylda kólik qyzmetkerleriniń sany 55 myńǵa artty. Osylaısha, jumysshylar 2020 jyly – 717 509 adam, 2021 jyly – 709 501 adam, 2022 jyly – 740 553 adam, 2023 jyly – 747 723 adam, 2024 jyly – 770 059 adamǵa jetti. Al bıyl transport salasynda 772 707 maman qyzmet etedi, – deıdi Kólik mınıstrliginiń mamandary Kazinform tilshisiniń saýalyna bergen jaýabynda.

Jyl basynan beri istelgen jumys ta az emes. Máselen, jarty jylda 911,1 mıllıon adam avtobýs, taksı, trolleıbýs sekildi kólik quraldarymen sapar shekse, ushaqtar 7,2 mıllıon jolaýshy tasymaldaǵan. Taǵy 9,5 mıllıon adam poıyzben qatynapty.

– 2025 jyldyń alǵashqy alty aıynda Qazaqstanda kóliktiń barlyq túrimen 928 mıllıon jolaýshy tasymaldandy. Bul ótken jyldyń sáıkes kezeńimen salystyrǵanda 10,5%-ǵa artyq. Al júk tasymaldaý kólemi de shamamen 11%-ǵa ósti. Bıyl alǵashqy jartyjyldyqta 550,8 mıllıon tonna júk tasymaldandy, – deıdi jaýaptylar.

Kólik mınıstrligi aldaǵy 4 jylda kólik salasyna:

• kólik qozǵalysynyń qaýipsizdigin qamtamasyz etetin jetekshi temirjol jumysshy mamandary;

• asfalt tósegish mashınısti;

• jol jumysshysy;

• ekskavator mashınısti;

• áýe qozǵalysyn basqarý jáne áýe navıgatsııasymen qamtamasyz etý mamandary;

• áýejaılardyń jerústi radıoelektrondyq jabdyqtaryna tehnıkalyq qyzmet kórsetý mamandary;

• ushýlardy meteorologııalyq qamtamasyz etý mamandary;

• qurylys ınjeneri;

• kólik nysandaryn salý ınjeneri;

• topyraqpen jumys isteý ınjeneri;

• tehnık-qurylysshy;

• motorıst-mashınısti;

• lebedka motorısti jáne ózge de jumysshylar qajet ekenin aıtady.

Aıta keteıik, jaýaptylar transport salasyndaǵy maman tapshylyǵyn retteý úshin Ǵylym jáne joǵary bilim mınıstrligimen birlese jumys istep jatyr. Nátıjesinde bıyl elimiz boıynsha kólik qurylysy salasyna oqýǵa túsýge nıettiler úshin memleketten 770 grant bólindi.

Esterińizde bolsa, buǵan deıin kólik salasy qyzmetkerlerine memlekettik nagradalar tabystalǵany týraly jazǵan edik.