Transplantologııany ári qara damytý úshin donor jetispeı otyr - DSM Medıtsınalyq járdemdi uıymdastyrý departamentiniń dırektory
ASTANA. 27 jeltoqsan. QazAqparat /Aıdar Ospanalıev/ - Qazaqstanda transplantologııa salasy qarqyndy damyp keledi.
Búgingi tańda elimizdiń medıtsına mamandary transplantologııamen baılanysty kúrdeli operatsııalardy júzege asyrýǵa daıyn. Bul týraly búgin transplantologııa máselesine baılanysty jýrnalıstermen bolǵan baspasóz máslıhatynda Densaýlyq saqtaý mınıstrliginiń Medıtsınalyq járdemdi uıymdastyrý departamentiniń dırektory Ajar Tóleǵalıeva málim etti.
Almatyda A.N.Syzǵanov atyndaǵy ulttyq ǵylymı hırýrgııa ortalyǵynda baýyrdy transplantatsııalaý operatsııasy sátti júzege asyryldy. «Búginde operatsııa jasalǵan azamattar ózderin jaqsy sezinip otyr. Sonymen qatar bıyl Ulttyq kardıohırýrgııalyq ortalyǵy sol jaq asqazandy aýystyrdy. Buǵan qosa elimizde búırekti transplantatsııalaý sharalary da júzege asyrylýda. Osylaısha adamnyń organdaryn aýystyrý qazaqstandyq medıtsına úshin de jańalyq bolýdan qaldy. Alaıda bul baǵytta bizdiń jumysymyzǵa tejeý bolyp otyrǵan bir másele bar. Ol organdy donormen baılanysty»,-dedi A.Tóleǵalıeva.
Onyń sózinshe, búginde álemniń kez kelgen memleketi mundaı joǵary tehnologııaly operatsııalardy júzege asyra almaıdy. «Al bizde buǵan qajetti quraldar da, mamandar da bar. Ókinishke oraı, osy operatsııalardy júzege asyrýǵa qajetti organdardyń joqtyǵy úlken problemaǵa aınalyp otyr. Sol sebepti biz osy máseleni qalyń kópshiliktiń nazaryna jetkizýdi jón sanap otyrmyz»,-dedi departament dırektory.
