Transplantolog Abylaı Donbaı aýrýhanaǵa qaıta oralǵanyn málimdedi

ShYMKENT. QazAqparat - Shymkenttegi tanymal transplantolog Abylaı Donbaı qyzmetine qatysty daý-damaıdan soń aýrýhanaǵa qaıta oraldy. Bul týraly ol áleýmettik jelidegi paraqshasynda jazdy, dep habarlaıdy QazAqparat tilshisi.

Sondaı-aq, dáriger 3 búırek jáne 1 baýyr transplantatsııasyn tegin jasap beretindigin málimdedi.

Kreslo nemese mamandyq degen suraqqa, ózimniń mamandyǵymdy tańdadym. Sol aýrýhanada qalǵan 3 búırek jáne 1 baýyr transplantatsııasyn tegin jasap beremin. Aýrýhanamen ýaqytsha eńbek sharty túzildi. Osy naýqastarǵa kómektesemin

, - dep jazdy Abylaı Donbaı.

Eske salsaq, budan buryn Shymkent qalalyq №1 klınıkalyq aýrýhanasynyń bas dárigeri Abylaı Donbaı jumystan ketkeni, transplantatsııalyq ota jasamaıtyndyǵy jóninde málimdeme jasaǵan bolatyn.

Shymkent qalasy Densaýlyq saqtaý basqarmasy 10 shildeden bastap A. Donbaımen eńbek sharty toqtatyǵanyn málimdegen edi. Sondaı-aq, qaladaǵy medıtsınalyq uıymdarda aǵza almastyrý otasyn jasaıtyn dárigerler jetkilikti ekendigin jáne transplantatsııalyq ota toqtamaıtyndyǵyn jetkizdi.

Aıta keteıik, 5 shilde kúni Shymkent júrek ortalyǵynda 61 jastaǵy turǵynǵa júrek transplantatsııasy jasaldy. Ota kezinde kardıohırýrgter patsıentke 46 jastaǵy er adamnyń júregin ornatyp berdi. Qazir júregin aýystyrǵan shymkenttiktiń jaǵdaıy qalypty.