Transplantatsııanyń sátsiz ótýi óte sırek kezdesedi - dáriger
ASTANA. KAZINFORM - Qazaqstanda transplantatsııa operatsııasynyń sátsiz aıaqtalýy óte sırek kezdesedi. Dárigerlerdiń aıtýynsha, mundaı kúrdeli otaǵa deıin patsıent pen donor jan-jaqty tekseristen ótedi, al operatsııadan keıin bolýy múmkin qaýipter aldyn ala túsindiriledi.
QR Densaýlyq saqtaý mınıstrligi Transplantattaý jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵy dırektorynyń orynbasary Nazgúl Jylgeldınanyń aıtýynsha, transplantatsııa – álemdegi eń kúrdeli operatsııalardyń biri.
– Ota jasalmaı turyp kóptegen zertteý júrgiziledi. Olardyń basty maqsaty – asqynýlardyń aldyn alyp, transplantatsııalanǵan aǵzanyń qyzmetin toqtatý qaýpin barynsha azaıtý. Eger dárigerler klınıkalyq hattamany saqtamaı, operatsııany belgilengen talaptarǵa saı júrgizbese, olar zań aıasynda jaýapqa tartylady, – dedi ol.
Óz kezeginde Ulttyq ǵylymı onkologııa ortalyǵynyń Aǵzalardy transplanttaý sektorynyń jetekshisi Mels Asyqbaev transplantatsııanyń sátsiz aıaqtalýy óte sırek kezdesetinin aıtty.
Onyń sózinshe, transplantatsııa aldynda aǵza almastyrýdy qajet etetin patsıentke de, týystyq transplantatsııa kezinde donorǵa da operatsııanyń hırýrgııalyq jáne ımmýnologııalyq erekshelikteri, sondaı-aq otadan keıin týyndaýy múmkin asqynýlar tolyq túsindiriledi.
– Otanyń sátsiz ótýi óte sırek kezdesedi. Eger otadan keıin donor aǵza qyzmetin toqtatsa, ony alyp tastaý transplantatsııa jasalatyn mamandandyrylǵan ortalyqtarda júrgiziledi, – dedi transplantolog dáriger.
Jalpy Qazaqstanda zamanaýı transplantatsııa qyzmeti iske qosylǵannan beri 3 270 aǵza transplantatsııasy jasaldy. Onyń 2 726-sy nemese 82%-y tiri donorlardyń qatysýymen, al 544-i nemese 18%-y qaıtys bolǵan donorlardyń aǵzalaryn paıdalaný arqyly oryndalǵan.
Eske salaıyq, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
