«Transparency International»: Qazaqstan jemqorlyqpen kúres deńgeıi boıynsha 9 satyǵa kóterildi

ASTANA. QazAqparat - Búkil álem boıynsha sybaılas jemqorlyqpen kúrestiń jáne jemqorlyq deńgeıin zertteıtin «Transparency International» halyqaralyq uıymynyń baǵalaýymen Qazaqstan 131 orynnan 122 orynǵa kóterildi. Bul týraly OKQ-da ótken baspasóz máslıhatynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń qoǵammen baılanys jónindegi departamentiniń dırektory Arman Berdalın málim etti, dep habarlaıdy QazAqparat tilshisi.

«Shtab páteri shetelde ornalasqan álemde eshkimge baǵynbaıtyn «Transparency International» degen táýelsiz álemdik sarapshy uıym bar. Ol álemdegi búkil 180-nen astam memleketke - qaı jerde jemqorlyq ósti, qaı jerde azaıdy - baǵa beredi. Solardyń bergen baǵasy boıynsha 2016 jyly biz 131 orynda turǵanbyz. Al endi qoǵam ókilderin jumysqa jumyldyrýdyń arqasynda biz 9 satyǵa kóterilip, 122 orynǵa turaqtadyq. Biz 131 orynda turǵanda jemqorlyq eń qatty damyp ketti, tereń tamyryn jaıyp ketti degen memleketterdiń qatarynda bolǵanbyz. Al qazir shúkir deıtindeı jaǵdaıǵa keldik. Sondyqtan, bizdiń maqsatymyz - qoǵamnyń ózin, jurttyń ózin osyǵan jumyldyrý», - dedi Arman Berdalın.

Aıta ketsek, «Transparency International» - búkil álem boıynsha sybaılas jemqorlyqpen kúrestiń jáne jemqorlyq deńgeıin zertteıtin úkimettik emes halyqaralyq uıym. Transparency International halyqaralyq qozǵalysy Búkilálemdik banktiń burynǵy dırektory Peter Aıgenniń bastamasymen 1993 dyly Berlınde bastalǵan. Qazirgi ýaqytta álemdegi 100-ge jýyq elde uıymnyń bólimsheleri jumys isteıdi.