Transkaspıı halyqaralyq kólik dálizi arqyly júk tasymalynyń kólemi 2,5 esege artty
«Biz Transkaspıı halyqaralyq kólik dáliziniń (THKD) damý áleýetin paıdalanýǵa belsendi túrde shaqyryp kelemiz. Statıstıka boıynsha bul baǵyttyń jalpy ótkizý qabileti jylyna 5,8 mln tonna júkti quraıdy. Biraq ótken jyly 1,5 mln tonna júk tasymaldandy. Bul 2021 jylǵy kórsetkishpen salystyrǵanda 2,5 ese kóp. Naqty aıtsaq, konteınerlik tasymaldaý kólemi 33 myń jıyrma fýttyq ekvıvalentti (JFE) konteınerdi qurady, Transkaspıı halyqaralyq kólik dáliziniń áleýeti búginde 80 myń JFE konteınerin quraıdy. Ótken jyly nebári 33 myń bolǵan», - dedi Qaırat Balyqbaev.
Onyń aıtýynsha, THKD-ge qatysýshy elderdiń Úkimet músheleri ótken jyly jınalyp, bul baǵyttyń mańyzdylyǵyn atap ótti. Transkaspıı baǵytynyń áleýetin aıta otyryp, vıtse-mınıstr tranzıttik júk tasymalynan basqa, bul baǵyt otandyq óndirýshilerge Eýropa naryǵyna shyǵýǵa múmkindik beretinin aıtty.
«Ótken jyly tasymaldanǵan 1,5 mln tonna júktiń 60%-y — qazaqstandyq eksport boldy. Qazirdiń ózinde THKD – de qazaqstandyq eksporttyń júk aǵynynyń edáýir bóligi, ıaǵnı, munaı hımııasy, qara, tústi metaldar, kómir, ferroqorytpalar, astyq, basqa da júkter qaıta baǵdarlanǵanyn atap ótýge bolady. Biz THKD áleýetiniń ósýimen qazaqstandyq ónimniń eksporty da artady dep sanaımyz», - dedi ol.
Vıtse-mınıstr Qaırat Balyqbaev, sondaı-aq, Úkimet Aqtaý teńiz portynyń erkin ekonomıkalyq aımaǵy bazasynda konteınerlik hab qurý máselesi pysyqtalyp jatqanyn, Quryq portynyń qurylysy aıaqtalýǵa jaqyn ekenin aıtty.
