Transkaspıı halyqaralyq kólik baǵyty: Grýzııanyń Potı qalasynda mýltımodaldy port termınalynyń qurylysy bastaldy

ASTANA. QazAqparat - Qazaqstannyń Grýzııadaǵy Elshiliginiń qoldaýymen Qazaqstan men Grýzııanyń bolashaq jahandyq ınfraqurylymdyq obektisiniń qurylys ornynda eki eldiń bıznes jáne memlekettik organdary ókilderiniń qatysýymen kapsýla salyndy, dep habaralıdy QR SІM baspasóz qyzmeti.

«PTC Holding» kompanııalar toby Potı portynda josparlanǵan mýltımodaldy termınal aýmaǵyndaǵy qurylymdardy bólshekteýdi aıaqtap, onyń qurylys jumystaryna kiristi. Salynyp jatqan termınal Transkaspıı halyqaralyq kólik baǵyty (THKB) boıynsha júk tasymalynyń kólemin arttyrýǵa yqpal etetin bolady.

«Port termınalynyń qurylysy Grýzııanyń iri porttarynyń biri, THKB-nyń tirek núktesi retinde Potıde iske asyrylatyn alǵashqy qazaqstandyq ınfraqurylymdyq joba bolady» – dedi kapsýla salý rásimi barysynda «PTC Holding» kompanııalar tobynyń basqarma tóraǵasy Tımýr Qarabaev.

Onyń aıtýynsha, termınaldy paıdalanýdyń alǵashqy jyldarynda THKB jáne CASCA+ mýltımodaldy kólik baǵyty sheńberinde júkterdi tartýǵa basty nazar aýdarylatyn bolady, bul jylyna 80 myń TEU (20 fýttyq ekvıvalenttegi konteınerler) óńdeýge jáne kólemin odan ári ulǵaıtýǵa múmkindik beredi. 2021 jyly THKB baǵyty sheńberinde 25,2 myń TEU, 2022 jyly – 33,6 myń TEU tasymaldandy, al 2023 jyly bul kórsetkish 52,9 myń TEU deńgeıinde boljanýda.

«PTC Holding» damý jónindegi dırektory Oljas Aryqbaevtyń aıtýynsha, jobaǵa salynǵan ınvestıtsııanyń jalpy kólemi 15-20 mln dollarǵa baǵalanady. Onyń qarjylandyrýyn qazaqstandyq jáne grýzındik qatysýshylardyń parıtettik negizde júzege asyrylatyn bolady. Sondaı-aq, 2024 jyldyń 1-shi toqsanynda jobanyń birinshi kezegin paıdalanýǵa berý josparlanǵanyn habarlady. Jumys tehnologııasyn eskere otyryp, termınaldyń eń joǵarǵy óńdeý kúshi jylyna 450 myń TEU quraıdy.