Transkaspıı halyqaralyq kólik dálizine Bolgarııa porttaryn qosý máselesi qarastyrylady
ASTANA. KAZINFORM – Transkaspıı halyqaralyq kólik dálizine Bolgarııanyń Býrgas jáne Varna teńiz porttaryn qosý máselesi qarastyrylady. Bul týraly Aqordada Bolgarııa Prezıdenti Rýmen Radevpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
- Búgingi kelissózderimiz mazmundy boldy. Naqty ýaǵdalastyqtarǵa qol jetkizdik. Atap aıtqanda, saýda-ekonomıka jáne ınvestıtsııa salasyndaǵy baılanystyń aýqymyn keńeıtýge basa nazar aýdardyq. Eki el arasyndaǵy alys-beris ósip jatyr. Bul jaqsy úderis. Elimizde 60-jýyq bolgar kompanııasy bar. Olar túrli salada tabysty jumys istep jatyr. Degenmen, elderimizdiń ekonomıkalyq áleýeti budan álde qaıda joǵary. Sondyqtan bul kórsetkishti ulǵaıta túsýge mol múmkindik bar. Biz ózara saýda-sattyq kólemin arttyra túsýge kelistik. Qos memlekettiń múddesine saı keletin jańa ınvestıtsııalyq jobalardy pysyqtaýǵa ýaǵdalastyq. Ásirese, munaı-gaz jańartylatyn energııa, jasyl energetıka, atom ónerkásibi, tsıfrlandrý, ınnovatsııa, jasandy ıntellekt, ǵarysh salasy, aýyl sharýashylyǵy, densaýlyq saqtaý, mádenı-gýmaıtarlyq baılanystar jáne týrızm sııaqty salalarda birlesken jobalardy júzege asyrý mańyzdy ekenin atap óttik, - dedi Qasym-Jomart Toqaev.
Sondaı-aq Memleket basshysy kólik-logıstıka sektoryndaǵy baılanysty damytý máselesine nazar aýdarylǵanyn aıtty.
- Búginde Transkaspıı halyqaralyq kólik dálizi strategııalyq saýda jolynyń birine aınaldy. Osy dálizge Bolgarııanyń Býrgas jáne Varna teńiz porttaryn qosý máselesin qarastyrýǵa kelistik. Bul jumysqa eki eldiń ekonomıkalyq yntymaqtastyq jónindegi úkimetaralyq komıssııasy basa mán berýi qajet dep sanaımyz. Men komıssııa aıasynda kólik-logıstıka salasyndaǵy yntymaqtastyq jónindegi birlesken jumys tobyn qurýdy usyndym. Budan bólek, Bolgarııanyń ǵaryshtyq zertteýler men tehnologııalar, qorǵanys ónerkásibi salasyndaǵy ozyq tájirıbesin zerdelep, birlese jumys isteýge daıyn ekenimizdi jetkizdim, - dedi Prezıdent.
Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Bolgarııa Prezıdenti Rýmen Radevti qarsy alǵanyn jazǵan edik.
Keńeıtilgen quramdaǵy kelissóz barysynda Memleket basshysy Qasym-Jomart Toqaev Bolgarııa men Qazaqstan arasynda iskerlik keńesi qurylatynyn aıtty.