Transkaspıı halyqaralyq kólik baǵytyn kúsheıtý úshin ne istelinip jatyr

ASTANA. KAZINFORM – Kólik mınıstrligi Transkaspıı halyqaralyq kólik baǵytyn kúsheıtý úshin qandaı is-sharalar qolǵa alynǵanyn málim etti.

Aıta keterligi, ótken jyldan beri buqaralyq aqparat quraldarynda Reseı tarapy Qazaqstan aýmaǵyn aınalyp ótetin «Ońtústik kólik dálizine» bastamashylyq jasaǵany týraly málimet taraǵan bolatyn. Osyǵan oraı Kólik mınıstrliginen atalǵan dálizdiń Transkaspıı halyqaralyq kólik baǵytyna qanshalyqty básekeles bola alatyndyǵyn suraǵan edik.

«Mınıstrlik búginde Transkaspıı halyqaralyq kólik baǵytynan júkterdi basqa balama baǵyttarǵa baǵdarlaýǵa jol bermeý maqsatynda ınfraqurylym men termınaldyq qýattardy jaqsartý, port qýattaryn keńeıtý, jyljymaly quramdy ulǵaıtý, ákimshilik kedergilerdi alyp tastaý jáne tasymaldaýshylar úshin qolaıly jaǵdaılar jasaý boıynsha belsendi jumys júrgizýde», - dep jaýap berdi vedomstvodan. 

Reseı bastama jasap otyrǵan «Ońtústik kólik dálizi» - bul teńiz jáne qurlyq joldaryn qosatyn mýltımodaldy baǵdar. Ol bastaýyn Qyrǵyzstannan alyp, Ózbekstannan ótip, Túrikmenstannyń Kaspıı teńizindegi Túrikmenbashy portyna deıin sozylady. Odan ary teńiz arqyly Astrahanǵa jetedi.