Transkaspıı halyqaralyq kólik baǵyty boıynsha júk tasymaly sońǵy 5 jylda 6 esege ósti

ASTANA. KAZINFORM — Prezıdent Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn jáne ózge de tapsyrmalaryn júzege asyrý aıasynda Úkimet halyqaralyq kólik baǵyttaryn damytý boıynsha jumys júrgizýde. 

Sonyń ishinde Memleket basshysy Transkaspıı halyqaralyq kólik baǵytyn (THKB) damytý úshin áriptes eldermen kúsh biriktirý mindetin qoıdy. Búgingi tańda bul baǵyttaǵy jumystar naqty nátıje berip jatyr.

Kólik mınıstrliginiń málimetinshe, sońǵy 5 jylda baǵyt boıynsha júk tasymaldaý kólemi alty esege — 2020 jylǵy 0,8 mln tonnadan 2024 jyly 4,5 mln tonnaǵa deıin ósti. 2025 jyldyń alǵashqy jartysynda tasymal kólemi 2,3 mln tonnaǵa jetip, bul ótken jyldyń sáıkes kezeńimen salystyrǵanda 7%-ǵa artyq boldy.

Konteınerlik tasymaldardyń aıtarlyqtaı artýyna kedendik rásimderdi avtomattandyrý da yqpal etti: endi bir konteınerlik poıyzdy rásimdeýge nebári 30 mınýt ketedi, buryn bul protsess úsh saǵatqa deıin sozylatyn edi.

— Jýyrda qytaı tarapymen birlesip Aqtaý portynda konteınerlyq termınal iske qosyldy. Sıan qalasynda bizdiń qurǵaq port tabysty jumys istep tur. Selıatıno, Svısloch jáne Býdapesht mańynda jańa termınaldar salynýda. Maýsym aıynda Grýzııanyń Potı portynda Qazaqstannyń alǵashqy mýltımodaldy termınaly ashyldy, — dedi Maqsat Qalıaqparov.

Transkaspıı baǵyty boıynsha qytaı avtopoıyzdarynyń qozǵalysynyń bastalýy da mańyzdy oqıǵalardyń biri boldy: 2024 jyly Quryq porty arqyly 3,5 myńǵa jýyq júk kóligi ótti, al bıylǵy jyldyń alǵashqy jartysynda olardyń sany myńnan asty.