Transkaspıı halyqaralyq kólik baǵdary boıynsha júk tasymaly 6 jylda bes ese ósti
ASTANA. KAZINFORM - Bul týraly Memleket basshysy Qasym-Jomart Toqaev «Qazaqstan – EO» dóńgelek ústelinde sóılegen sózinde málim etti, dep habarlaıdy Aqordanyń baspasóz qyzmeti.
Sodan keıin Prezıdent yntymaqtastyqtyń perspektıvti baǵyttaryna egjeı-tegjeıli toqtaldy.
Qasym-Jomart Toqaev eń áýeli eýropalyq seriktesterge Qazaqstannyń Eýropany Ortalyq Azııamen, Qytaımen, Kavkazben jáne Taıaý Shyǵyspen baılanystyratyn óńirlik logıstıkalyq habqa aınalýǵa umtylatynyn aıtty.
– Biz ınfraqurylymǵa, atap aıtqanda, myńdaǵan shaqyrym temir jol salýǵa jáne Transkaspıı halyqaralyq kólik baǵdaryn damytýǵa qomaqty qarjy quıyp jatyrmyz. Bul kúsh-jigerimiz Eýropalyq Odaqtyń Global Gateway strategııasymen úılesip, Orta dálizdi eýrazııalyq qaýipsiz baılanysqa arnalǵan negizgi ári ornyqty magıstralǵa aınaldyrady. Kólik ınfraqurylymyn jańǵyrtý qazirdiń ózinde oń nátıje kórsetti. Sońǵy alty jylda atalǵan baǵyt boıynsha júk tasymaly bes ese – jyl saıyn 0,8 mıllıon tonnadan 4,1 mıllıon tonnaǵa deıin ósti. Dálizdiń júk ótkizý qabiletin 10 mıllıon tonnaǵa deıin ulǵaıtýdy kózdeımiz. Bul meje elimizdiń álemdik logıstıkada mańyzdy kúrejol retindegi pozıtsııasyn nyǵaıtady. Osy qarqyndy saqtaý úshin Qazaqstan sońǵy 15 jylda kólik jáne logıstıka ınfraqurylymyna 35 mıllıard dollardan astam qarjy saldy. Búginde Kaspıı teńizi jaǵalaýyndaǵy Aqtaý jáne Quryq porttary halyqaralyq tranzıttiń mańyzdy qaqpasy retinde qyzmet etedi, – dedi Qasym-Jomart Toqaev.
Memleket basshysy búgin Qazaqstan damý banki men Eýropalyq ınvestıtsııalyq bank arasynda, sondaı-aq quramyna Commerzbank, JPMorgan Chase Bank jáne Standard Chartered Bank kirgen Bankter sındıkaty MIGA (Investıtsııalyq kepildikter jónindegi kópjaqty agenttiktiń) kepildigimen qol qoıylǵan, quny shamamen 1 mıllıard dollar bolatyn logıstıkalyq ınfraqurylym salasyndaǵy kelisimdi quptady.
Osyǵan deıin ótken jyly EO-men ekijaqty taýar aınalymy 45 mıllıard dollardan asqany týraly jazdyq.
