Transkaspıı halyqaralyq dálizi arqyly júk tasymaly 10 mln tonnaǵa artady
ASTANA. KAZINFORM — Byltyr Transkaspıı halyqaralyq kólik dálizimen 4,5 mln tonna júk tasymaldandy.
— Kún tártibinde eki el arasynda, sondaı-aq jalpy óńir úshin mańyzy zor strategııalyq jobalar barshylyq. Qazir Transkaspıı halyqaralyq kólik dálizin damytýǵa úlken kúsh salyp jatyrmyz. Byltyr dálizben júk tasymaly 4,5 mln tonnaǵa deıin ósti (+62%). Bolashaqta júk kólemin 10 mln tonnaǵa jetkizý kózdelýde, — dedi QR Premer-mınıstriniń orynbasary — Syrtqy ister mınıstri Murat Nurtileý BAQ ókilderi aldynda málimdeme jasaı turyp.
Mınıstrdiń aıtýynsha, osy oraıda Qazaqstan men Ázerbaıjannyń birlesken «Middle Corridor Multimodal Ltd» kásiporny eleýli ról atqarady.
— Qazaqstan úshin talshyqty-optıkalyq baılanys jelisi zamanaýı tsıfrlyq dálizdi qurýdaǵy mańyzdy qadam. Ony iske qosýda belsendi yntymaqtastyqqa daıynbyz. Kaspıı túbine tereń sý elektr kabelin júrgizý jobasyn ilgeriletýge qatysty bastama áleýetin joǵary baǵalap, bul jumysty jandandyrýǵa árqashanda ázirmiz, — deıdi ol.
Aıta keteıik, búgin elordaǵa Ázerbaıjan Respýblıkasynyń Syrtqy ister mınıstri Djeıhýn Baıramov resmı saparmen keldi.
Sapar aıasynda ázerbaıjandyq mınıstr Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileýmen shaǵyn jáne keńeıtilgen quramda kelissóz ótkizdi.