Transkaspıı dálizi arqyly júk tasymaly 3,5 ese ósti
ASTANA. KAZINFORM — Eýropalyq Odaq pen Qazaqstan Astanada ótken Transkaspıı kólik dálizin úılestirý platformasynyń úshinshi ulttyq semınary barysynda Transkaspıı kólik dálizin (TKD) odan ári damytý jónindegi óz mindettemelerin rastady.
Semınarǵa memlekettik organdardyń, halyqaralyq qarjy ınstıtýttarynyń, ulttyq kompanııalardyń, damý jónindegi seriktesterdiń jáne jeke sektordyń ókilderi qatysyp, osy ýaqytqa deıin qol jetkizilgen nátıjelerdi talqylap, Eýropa men Ortalyq Azııa arasyndaǵy kólik baılanysyn nyǵaıtýdyń kelesi qadamdaryn qarastyrdy. Semınarǵa Qazaqstan Respýblıkasy Kólik vıtse-mınıstri Talǵat Lastaev jáne Eýropalyq Odaqtyń Qazaqstandaǵy elshisi Aleshka Sımkıch hanym teń tóraǵalyq etti.
Іs-shara 2026 jylǵy 23 maýsymda ótetin jáne dáliz boıyndaǵy barlyq el arasyndaǵy yntymaqtastyqty keńeıtýge baǵyttalǵan Transkaspıı kólik dálizi boıynsha joǵary deńgeıdegi kezdesýdiń qarsańynda uıymdastyryldy.
— Eýropalyq Odaq quny 30 mıllıon eýro bolatyn Transkaspıı kólik dálizin qoldaý baǵdarlamasy jáne basqa da jobalar arqyly Aqtaý portynyń ınfraqurylymyn jańǵyrtýdy, Beıneý — Sekseýil avtomobıl jolyn keshendi jańǵyrtýǵa daıyndyqty qoldaıdy, sondaı-aq shekaraaralyq rásimderdi úılestirý men tsıfrlandyrýǵa járdemdesedi. Eýropalyq Odaqtyń bankterimen jáne bıznes ókilderimen, Eýropalyq Odaqqa múshe memlekettermen, sondaı-aq Ortalyq Azııadaǵy seriktesterimizben tyǵyz yntymaqtastyqta biz dálizdiń jyldamdyǵy men senimdiligin arttyrý baǵytynda naqty nátıjelerge qol jetkizip kelemiz, — dedi elshi Sımkıch.
Eýropalyq Odaqtyń Global Gateway strategııasy aıasynda Transkaspıı kólik dálizi, Eýropa jáne Ortalyq Azııa arasyndaǵy ornyqty baılanysty nyǵaıtýdyń negizgi basymdyqtarynyń birine aınaldy, bul rette Qazaqstan eýrazııalyq kólik toraby retinde aıryqsha mańyzdy ról atqarady. Sońǵy jyldary dáliz arqyly júk tasymaly kólemi 3,5 eseden astam ósti, al Qytaı men Eýropa arasyndaǵy tasymal ýaqyty túrli ınfraqurylymdyq jobalar men kólik protsesterin jetildirý nátıjesinde edáýir qysqardy. 2024 jyldan bastap Eýropalyq Odaq pen halyqaralyq qarjy ınstıtýttary óńirdegi naqty jobalarǵa shamamen 2,5 mıllıard eýro kóleminde qarjy bóldi.
Semınar barysynda qatysýshylar Aqtaý jáne Quryq porttaryn jańǵyrtý, Transkaspıı kólik dáliziniń negizgi baǵyttary boıyndaǵy avtomobıl, temirjol jáne logıstıkalyq ınfraqurylymdy damytý, jeke ınvestıtsııalardy jumyldyrý jáne dálizdiń tıimdiligin odan ári arttyrý jónindegi basqa da sharalardy talqylady.
Kezdesý qorytyndysy boıynsha qatysýshylar ınfraqurylymdy damytý, tsıfrlyq transformatsııa, retteýshi reformalar jáne jańa ınvestıtsııalyq jobalar boıynsha yntymaqtastyqty jalǵastyrýǵa mindettemelerin rastady. Bul bastamalar Transkaspıı kólik dáliziniń Eýrazııadaǵy negizgi saýda jáne kólik baılanysy baǵyttarynyń biri retindegi rólin odan ári nyǵaıtýǵa baǵyttalǵan.
Aıta ketelik Úkimet basshysy Aqtaý men Quryq porttarynyń ınfraqurylymyn jańǵyrtýdy jedeldetý qajet ekenin aıtqan edi.
