Transkaspıı dálizi arqyly júk tasymaly 10 mln tonnaǵa deıin ulǵaıady
ASTANA. KAZINFORM – Transkaspıı dálizi arqyly sońǵy bes jylda osy baǵyttaǵy tasymal kólemi alty ese ósip, 2020 jylǵy 800 myń tonnadan ótken jyly 4,5 mln tonnaǵa jetti. Bul týraly Úkimet basshysynyń orynbasary Qanat Bozymbaev málim etti.
- Elimizdiń ınfraqurylymyn jańǵyrtý maqsatynda byltyr shildede 2029 jylǵa deıingi ulttyq ınfraqurylymdyq jospar bekitildi. Jospardyń negizgi maqsaty – tirshilikti qamtamasyz etý júıesin damytý, halyqtyń qajettiligin qanaǵattandyrý, sondaı-aq ekonomıkalyq ósimdi qamtamasyz etý. Negizgi baǵyttarǵa toqtalatyn bolsam, eń aldymen búginde Qazaqstan men búkil óńir úshin strategııalyq ról atqaryp otyrǵan Transkaspıı halyqaralyq kólik baǵytynyń damýyn erekshe atap ótkim keledi. Sońǵy bes jylda osy baǵyttaǵy tasymal kólemi alty ese ósip, 2020 jylǵy 800 myń tonnadan ótken jyly 4,5 mln tonnaǵa jetti. Aldaǵy ýaqytta júk tasymaly kólemin jylyna 10 mln tonnaǵa deıin ulǵaıtý josparda bar, - dedi Qanat Bozymbaev elordada Astana Finance Day – 2025 halyqaralyq forýmynda.
Vıtse-premerdiń málimdeýinshe, bul nátıje básekege qabilettilikti aıqyn kórsetedi.
- Ótken jyldyń jeltoqsanynda negizgi júıeni jańǵyrtýǵa jáne senimdi energııamen qamtamasyz etýge baǵyttalǵan «Energetıkalyq jáne kommýnaldyq sektorlardy jańǵyrtý» ulttyq jobasy qabyldandy. Negizgi ındıkator – tozý deńgeıin 40%-ǵa deıin tómendetý. 86 myń shaqyrymdyq ınjenerlik jelini jańǵyrtýǵa shamamen 6,8 trln teńge ınvestıtsııa tartý josparlanyp otyr, bul apat sanyn edáýir azaıtýǵa múmkindik beredi. Sonymen qatar 2035 jylǵa deıin keminde 26 GVt jańa energııa óndirýshi qýat kózin engizý jospary júzege asyrylyp jatyr. Bul jańartylatyn energııa kóziniń úlesin arttyrý, manevrlik gaz generatsııasyn, gıdroresýrsty jáne bazalyq kómirtekti qýat kózin damytý esebinen iske aspaq, - deıdi ol.
Buǵan deıin habarlaǵanymyzdaı, elordada Astana Finance Day – 2025 halyqaralyq forýmy ótip jatyr.