Transkaspıı baǵyty boıynsha júk tasymaly 5 jylda 3 esege artty
ASTANA. KAZINFORM – Transkaspıı halyqaralyq kólik baǵyty (THKB) boıynsha tranzıttik tasymal kólemi sońǵy bes jylda úsh esege ósti.
QR Kólik mınıstrliginiń Temirjol jáne sý kóligi komıtetiniń tóraǵasy Nurjan Kelbuganov Mańǵystaý oblysyna jumys sapary barysynda teńiz ınfraqurylymyn damytý jobalarymen tanysty. Ol Aqtaý jáne Quryq porttaryndaǵy nysandardy aralap, keme qatynasy kompanııalarynyń ókilderimen kezdesti.
– Transkaspıı halyqaralyq kólik baǵytyn damytý – elimizdiń tranzıttik áleýetin arttyrýdaǵy negizgi strategııalyq mindetterdiń biri. Sońǵy jyldary port ınfraqurylymyn jańǵyrtý jáne tsıfrlyq sheshimderdi engizý arqyly tasymal kóleminiń aıtarlyqtaı ósýine qol jetkizildi. Aldaǵy kezeńde bul baǵyttaǵy jumystar jalǵasyp, Qazaqstannyń negizgi tranzıttik hab retindegi pozıtsııasy kúsheıtiledi, – delingen kezdesý qorytyndysynda.
Búginde Aqtaý portynda konteınerlik hab pen kemeler qozǵalysyn basqarý júıesi iske qosylyp, Quryq portynda aılaq akvatorııasyn tereńdetý jáne №1 aılaqty jańǵyrtý jumystary aıaqtalǵan. Sonymen qatar jol boıy servıstik ınfraqurylym qalyptastyrylǵan.
Jyl sońyna deıin Aqtaý porty akvatorııasyn tereńdetý, Quryqtaǵy «Ersaı» termınalyn jáne konteınerlik ınfraqurylymdy damytý, birneshe aılaqty jańǵyrtý, býksırler satyp alý jáne tsıfrlyq júıelerdi engizý josparlanyp otyr.
Josparlanǵan jobalar porttardyń ótkizý qabiletin arttyryp, Qazaqstannyń THKB baǵytyndaǵy tranzıttik áleýetin odan ári kúsheıtýge múmkindik beredi.
Aıta keteıik, buǵan deıin halyqaralyq tasymaldaýshylarǵa jańa talap qoıylǵany habarlandy. Keminde 50% júk kóligi tasymaldaýshynyń óz menshiginde bolýy tıis.
