Transkaspıı baǵyty boıynsha tasymal kólemi 5,6 esege ósti
ASTANA. KAZINFORM – Teńiz ınfraqurylymyn damytý Qazaqstannyń halyqaralyq logıstıkadaǵy rólin odan ári nyǵaıtýǵa baǵyttalǵan. Qazaqstandyq teńiz porttarynyń jıyntyq qýaty búginde 21,8 mln tonnany quraıdy, al 2030 jylǵa qaraı ony 30 mln tonnaǵa deıin arttyrý josparlanýda. Bul týraly Úkimettiń baspasóz qyzmeti habarlady.
Sońǵy bes jylda Transkaspıı halyqaralyq kólik baǵyty boıynsha tasymaldaý kólemi 5,6 esege – 800 myńnan 4,5 mln tonnaǵa deıin ulǵaıdy.
Aqtaý jáne Quryq porttaryn damytý, jańa termınaldar salý, túbin tereńdetý jumystaryn júrgizý, aılaqtardy rekonstrýktsııalaý jáne teńiz flotyn keńeıtý jalǵasýda. 2029 jylǵa deıin qurǵaq júkter men konteınerlik kemelerdi qosa alǵanda taǵy 8 jańa keme satyp alý josparlanýda. Keshendi jańǵyrtý Transkaspıı baǵyty men «Soltústik – Ońtústik» halyqaralyq kólik dáliziniń ótkizý qabiletin jyl saıyn 6 mln tonnadan 10 mln tonnaǵa deıin ulǵaıtýǵa múmkindik beredi.
E-Joldar jáne Smart Cargo tsıfrlyq platformalary tasymaldardy basqarýdyń jańa deńgeıin qamtamasyz etedi.
Prezıdent Joldaýyn júzege asyrýdyń negizgi baǵyttarynyń biri kólik salasyna zamanaýı tsıfrlyq tehnologııalardy engizý bolyp sanalady. E-Joldar tsıfrlyq platformasyn qurý jumystary jalǵasýda. Ol avtomobıl joldaryn salý jáne jóndeý barysyn baqylaýdy qamtamasyz etedi, sonymen qatar kólik aǵyndaryn tsıfrlyq baqylaý júıesi damytylyp, ótkizý pýnktteri jańǵyrtylýda, ıntellektýaldy logıstıkalyq sheshimder engizilip, tasymaldardy basqarýdyń biryńǵaı tsıfrlyq ekojúıesi qalyptastyrylýda.
Smart Cargo tsıfrlyq platformasyn engizý, jasandy ıntellekt tehnologııalaryn qoldaný, mýltımodaldy tasymaldardy damytý jáne Memleket basshysynyń tapsyrmalaryna sáıkes júkterdiń «jasyl dáliz» qaǵıdaty boıynsha jedel ótýine jaǵdaı jasaý aıryqsha mańyzǵa ıe.
Kólik salasyn jańǵyrtý joldardy, temirjoldardy, avıatsııany, porttardy, jyljymaly quramdy jáne tsıfrlyq servısterdi qamtıdy. Bul ınfraqurylymnyń ótkizý qabiletin keńeıtedi, júk jáne jolaýshylar tasymalyn jedeldetedi ári aımaqtardyń baılanysyn arttyrady. Memleket basshysynyń tapsyrmalaryn oryndaý Qazaqstannyń tranzıttik áleýetin kúsheıtip, halyqaralyq dálizderdi damytady jáne Eýrazııanyń negizgi kólik-logıstıkalyq toraptarynyń biri retinde eldiń pozıtsııasyn nyǵaıtady.
Aıta ketelik Transkaspıı tsıfrlyq dálizin salýdyń eń kúrdeli kezeńi aıaqtalǵan edi.
