Transkaspıı baǵdary arqyly júk tasymaldaý kólemi 62% ósip, 4,5 mln tonnany qurady

ASTANA. KAZINFORM — Qazaqstan men Ázerbaıjan prezıdentteri brıfıng ótkizdi. Shara barysynda Prezıdent Toqaev bıylǵy kórsetkishter de kóńilge senim uıalatatynyn aıtyp, ósim 2 paıyzdy quraǵanyn alǵa tartty.

Memleket basshysy kelissózder kezinde iri ınfraqurylymdyq, sonyń ishinde Transkaspıı halyqaralyq kólik baǵdary sekildi strategııalyq turǵydan mańyzdy jobalardy júzege asyrý barysy qarastyrylǵanyn jetkizdi.

— Byltyr bul baǵytta júk tasymaldaý kólemi 62 paıyzǵa ósip, 4,5 mıllıon tonnany qurady. Bıylǵy kórsetkishter de kóńilge senim uıalatady, ósim 2 paıyzdy qurady. Sheteldik seriktestermen birge shekteýlerdi joıyp, dáliz boıynda biryńǵaı uzaq merzimdi tarıf ornatýǵa jumys istep jatyrmyz. Bul barlyq baǵdar boıynsha kedergisiz tasymaldaýdy qamtamasyz etip, tıimdilikti kóteretini sózsiz. ıAǵnı júk tasymalynyń kólemin josparǵa sáıkes 10 mıllıon tonnaǵa deıin jetkizýge múmkindik beredi. Budan bólek, porttardaǵy termınaldardyń qýatyn arttyrýǵa nazar aýdaryldy. Qazaqstan Aqtaýda konteınerlik hab qurylysyn júrgizýde. Sheteldik, sonyń ishinde qytaılyq seriktesterdiń qatysýymen Alıat portynda salynyp jatqan júk termınalynyń keleshegi zor. Kelissóz barysynda júk eksportyna arnalǵan jańa Transkaspıı parom júıesin qurý múmkindigin talqyladyq, — dedi Qasym-Jomart Toqaev.

Budan buryn habarlanǵandaı, Qasym-Jomart Toqaev pen Ilham Álıev ekijaqty kelissóz jáne Qazaqstan – Ázerbaıjan Joǵary memleketaralyq keńesi otyrysynyń qorytyndylary boıynsha buqaralyq aqparat quraldary ókilderine arnalǵan brıfıng ótkizdi.