Transgenderlerge Olımpıada oıyndarynda áıelder arasyndaǵy jarystarǵa qatysýǵa tyıym salynady
ASTANA.KAZINFORM - Halyqaralyq Olımpıada komıteti (HOK) transgender sportshylardyń Olımpıada oıyndaryndaǵy áıelder arasyndaǵy jarystarǵa qatysýyna tyıym saldy, dep habarlaıdy TASS.
The Times gazetiniń habarlaýynsha, HOK bul sheshimdi 2026 jyldyń basynda, uıym erlerdiń áıelderden fızıkalyq artyqshylyǵy týraly jan-jaqty ǵylymı dálelder alǵannan keıin qabyldaıdy.
Ótken aptada Halyqaralyq Olımpıada komıtetiniń medıtsınalyq jáne ǵylymı dırektory Djeın Tornton transgender sportshylardyń qatysýyna baılanysty áıelder sportyna qatysty qıyndyqtarǵa arnalǵan ǵylymı sholýdyń alǵashqy nátıjesin usynǵany habarlandy.
Halyqaralyq Olımpıada komıtetiniń bul másele boıynsha jańa saıasaty Italııadaǵy Olımpıada kezinde jarııalanýy múmkin ekendigi aıtyldy. Qazirgi ýaqytta transgender adamdarǵa HOK erejelerine sáıkes áıelder arasyndaǵy jarystarǵa qatysýǵa ruqsat etilgen, biraq sheshim halyqaralyq federatsııalardyń quzyrynda qalady.
Tokıo Olımpıadasynda alǵash ret transgender sportshy baq synasty. Jańa Zelandııalyq Lorel Habbard áıelder arasyndaǵy aýyr atletıka jarysyna 87 keli salmaq dárejesinde qatysyp, sońǵy orynǵa ıe boldy. 2024 jyldyń jazynda Aljırden kelgen Iman Helıf bokstan Olımpıada chempıony ataǵyn jeńip aldy (66 keli). Olımpıadadan keıin frantsýz jýrnalısi Djaffar Aıt Aýdııa Helıftiń jynysyn tekserý týraly esep jarııalady. MRT Helıftiń jatyry joq ekenin jáne ishki atalyq bezderi bar ekenin anyqtady. Hromosomalyq testileý onda XY karıotıpi bar ekenin rastady, al gormondyq testileý erlerdiń deńgeıine uqsas testosteron deńgeıin anyqtady.
Halyqaralyq Olımpıada komıtetiniń prezıdenti bolyp saılanǵannan keıin Kırstı Koventrı áıelder jarystaryn qorǵaý nıetin málimdedi.
Buǵan deıin AQSh Olımpıada komıteti transgender áıelderdiń jarystarǵa qatysýyna tyıym salǵany týraly habarlanǵan bolatyn.
