«Transformer» fılmine túsken akter Shyǵys Qazaqstanda júr
ÓSKEMEN. QazAqparat - Oqyrmandarynyń sany 8 mln adamnan asatyn qytaılyq tórt áıgili bloger Shyǵys Qazaqstannyń kórikti jerlerin aralap qaıtty, dep habarlaıdy QazAqparat tilshisi.
Kórshi eldiń tanymal bologerlerin Qazaqstanǵa «Qazaq týrızm» ulttyq kompanııasy shaqyrǵan eken. 2 kún Almaty men Shymkentti aralaǵan meımandar bir apta boıy Shyǵys Qazaqstannyń Katonqaraǵaı, Glýbokoe, Zyrıan aýdandarynyń eń kórikti jerlerin aralady. Tórt bloger Shyǵysqa jasaǵan saıahattan alǵan áserleri týraly arnaıy brıfıngte aıtyp berdi.
Quramynda «Sınhýa» agenttiginiń táýelsiz fotografy Se Bıntsın, gastronom-bloger Sýn Sıaopen, saıahatshy bloger Jan Jı Tao, jazýshy ári bloger Lıý Venven blogerler toby Berel qorymdary, Rahman qaınary, Aqbaýyr taýy, Buqtyrma sý qoımasy men Altaı Alpisi sııaqty nysandardy aralap, jergilikti halyqpen suhbattasypty.
«Іrgemizde Qytaıdyń mıllıard adamdyq naryǵy jatyr. Bul Shyǵys Qazaqstan sııaqty týrıstik áleýeti úlken óńir úshin jaqsy múmkindik. Ázirge qytaılyq týrısterdi vıza máselesi tejep otyr. Áıtpese bizdiń ásem tabıǵatqa qyzyǵýshylyq joǵary. Bul kelgen blogerdiń árqaısynda tek Weibo jelisinde ǵana 2 mln oqyrmany bar. Sondyqtan olardy shaqyrý arqyly biz Qytaı týrısteriniń nazaryn ózimizge aýdara aldyq» - deıdi oblystyq týrızm jáne syrtqy baılanystar basqarmasynyń basshysy Jasulan Sársebaev.
Qytaılyq blogerlerdiń arasynda óz elinen bólek álem jurtshylyǵyna tanylyp úlgergenderi de bar. Lıý Venven «Transformer» fılminde epızodtyq rólge túsken eken.
Meımandar Shyǵys Qazaqstannyń tabıǵaty men tarıhy óte qyzyqty bolǵanymen, servıs jaǵyn damytý kerek degen usynys aıtty. Olar ásirese aqysyz ınternet usyný, aǵylshyn tilinde aqparat berý, jol talǵamaıtyn kólikterdi jalǵa berý, avtomobıl joldaryn jaqsartý sııaqty máselelerge erekshe toqtaldy.
