Transfertterdiń kólemi aıtarlyqtaı azaıady - Baqyt Sultanov

ASTANA. QazAqparat - Kepildendirilgen transferttiń úlesi 2 trln teńgege deıin azaıtylady. Bul týraly Májilistiń jalpy otyrysynda 2016 jylǵy respýblıkalyq bıýdjettiń atqarylýy jónindegi esebi barysynda QR Qarjy mınıstri Baqyt Sultanov málim etti, habarlaıdy QazAqparat.

«2016 jyly syrtqy faktorlarǵa baılanysty negizgi eksporttyq taýarlardyń baǵasynyń tómendeýine qaramastan, ekonomıkanyń kólemi 1 paıyzǵa ósti. Ol bıýdjet kiristeriniń ulǵaıýyna jáne olardyń josparǵa qaraǵanda artyǵymen oryndalýyna birden-bir sebep boldy. Nátıjesinde kirister 109,1 paıyzǵa artyǵymen oryndaldy, bıýdjetke 7,7 trln teńge tústi. Bul 370 mlrd teńgeni Ulttyq qordan tartpaı saqtap qalýǵa múmkindik berdi. Shyǵystar 2015 jylǵa qaraǵanda 1 trln 338 mlrd teńgege ósýimen ıgerilip, 98,3 paıyzǵa atqaryldy. Bul aıtarlyqtaı joǵary deńgeı. Áleýmettik sala árqashanda basym bolyp tabylady. Olardyń Jalpy ishki ónimdegi úlesi byltyrǵy jyly 7,2 paıyzǵa jetip jalpy shyǵystardyń jartysyn qurady»,-dep atap ótti mınıstr.

Sonymen qatar ol bıýdjet tapshylyǵynyń kólemi Jalpy ishki ónimge shaqqanda 1,7 paıyzdy quraǵandyǵyn, ıaǵnı jospardan 18 paıyzǵa tómen bolǵanyn jetkizdi. Kiristerdi asyra oryndaý jáne shyǵystar boıynsha únemdeý esebinen 158 mlrd teńge qazynashylyq shotta kassalyq qaldyqtar qalyptasty.

 Budan bólek, B. Sultanov esepti qaraý kezinde qozǵalǵan máselelerdi sheshý joldaryna toqtaldy. «Bıýdjet kiristeriniń Ulttyq qordan alynatyn transfertterge táýeldiligi týraly biraz máseleler kóterildi. Rasynda, osy transfertterdiń kólemi ulǵaıdy. Olar daǵdarys kezinde ekonomıkany qoldaýǵa múmkindik berdi. Aldaǵy ýaqytta shyǵystardy qarjylandyrýdaǵy kepildendirilgen transferttiń úlesi birtindep 2020 jyly 2 trln teńgege deıin azaıatyn bolady. Al, Ulttyq qordyń aktıvterine keletin bolsaq, olardy dıversıfıkatsııalý arqyly qordyń tabysyn arttyrý kózdelip otyr. Budan basqa, respýblıkalyq menshikti jekeshelendirýden jáne holdıngterdiń aktıvterin básekeles ortaǵa berýden túsetin qarajattyń barlyǵy Ulttyq qorǵa jiberiletin bolady.

Salyqtyq ákimshilendirýdi jaqsartý barysynda eki mańyzdy máseleni sheshýimiz kerek. Ol bir jaǵynan bızneske qolaıly jaǵdaı týǵyzý, ekinshi jaǵynan memlekettik bıýdjet kiristerin ulǵaıtý»,-dedi vedomstvo basshysy.

Onyń aıtýynsha, jańa Salyq kodeksin ázirleý jumysynda elektrondy shot-faktýra qoldanatyn bıznes ókilderine qosylǵan qun salyǵyn 30 jumys kúni ishinde qaıtarý, qarsy tekserýlerdiń sany men kameraldyq tekserýdiń protsedýralaryn qysqartý kózdelip otyr.

 Sonymen qatar ekonomıkada salasynda qylmystyq buzýshylyqtardy boldyrmaý jáne izgilendirý aıasynda Qylmystyq kodekske tıisti ózgerister daıyndaldy.