Transfert: Májilis Senattyń qosymsha qarajat bólý usynysymen kelisti
ASTANA. KAZINFORM — Búgin Parlament Májilisiniń jalpy otyrysynda palata depýtattary jalpy sıpattaǵy transfertterge qatysty qujatqa Senat engizgen túzetýlermen kelisti.
Atap aıtqanda, búgin Májiliste «Respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2026 — 2028 jyldarǵa arnalǵan jalpy sıpattaǵy transfertterdiń kólemi týraly» Zańynyń QR Parlamenti Senaty jańa redaktsııada usynǵan jekelegen baptary qaraldy. Zańdy qabyldaý ártúrli ekonomıkalyq áleýeti bar óńirlerdiń qarjylyq múmkindikteri arasyndaǵy teńsizdikti joıýǵa yqpal etetin bolady. Bul óz kezeginde turǵylyqty óńirine qaramastan, halyqtyń memleket kepildik bergen qyzmetterdiń teń deńgeıine qol jetkizýin qamtamasyz etedi.
— Qaralyp otyrǵan zań 2025 jylǵy 22 qazanda Májilistiń jalpy otyrysynda qabyldandy. Al 20 qarashada Senattyń jalpy otyrysynda qaraý qorytyndysynda Respýblıkalyq bıýdjetten oblystyq, respýblıkalyq qalalar bıýdjetterine 2026 jylǵa beriletin bıýdjettik sýbventsııalardy ulǵaıtýǵa qatysty túzetýler engizý usynyldy. Parlament Senaty bastalǵan jáne jalǵasyp jatqan jobalardy aıaqtaý úshin eldi mekenderge áleýmettik, ınjenerlik jáne kólik ınfraqurylymyn damytýǵa 17,5 mlrd teńgege somasynda qosymsha qarajat bólýdi qarastyrdy. Bul turǵyda Májilistiń Qarjy jáne bıýdjet komıteti atalǵan zańǵa Senat usynǵan ózgeristermen kelisýdi usynady, — dedi Májilis depýtaty Erkin Ábil.
Eske salsaq, bıyl 20 qarashada Senattyń jalpy otyrysynda «Respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2026 — 2028 jyldarǵa arnalǵan jalpy sıpattaǵy transfertterdiń kólemi týraly» Zańy qaraldy. Senat qujattyń jekelegen baptaryn jańa redaktsııada usynyp, ony Májiliske qaıtardy.