«Transaero» áýe kompanııasynyń Qazaqstanǵa josparlanǵan reısteri ushyrylmaıdy
ASTANA. QazAqparat - 2015 jyly 20 qazanda «Transaero» áýe kompanııasynyń 81 reısi, sonyń ishinde Qazaqstan baǵytyndaǵy reısteri de ushyrylmaıtyn boldy.
Atap aıtqanda, 20 qazanda «Transaero» áýe kompanııasynyń Qazaqstan baǵytyndaǵy kelesi reısteri toqtatyldy: UN204 Astana - Vnýkovo; UN230 Qaraǵandy - Vnýkovo; UN255 Vnýkovo - Almaty; UN256 Almaty - Vnýkovo UN277 Vnýkovo - Aqtóbe; UN278 Aqtóbe - Vnýkovo. Jolaýshylardyń qolaılylyǵy úshin «Transaero» saıtynda reısterdiń statýsyn 2 kún buryn tekserý qyzmeti iske qosyldy. Toqtatylǵan reısterdiń jolaýshylary «Aeroflot» toby kompanııasynyń reısterimen tasymaldanady. «Transaero» áýe kompanııasynyń jolaýshylaryn úzdiksiz tasymaldaý úshin Aeroflot jedel shtab qurdy. «Transaero» jolaýshylaryn tasymaldaý 2015 jyldyń 15 jeltoqsanyna deıin júzege asady. Qazir 21-22 qazandaǵy reıster boıynsha táýliktik jospar qurastyrylyp jatyr. Ushý josparlary týraly aqparat Aeroflot pen «Transaeronyń» saıtyndaǵy jáne áleýmettik jelilerdegi paraqshalarynda kún saıyn jańartylady.
