Tramvaıdy ornynan qozǵaýǵa polıtsııa pármen bergen joq - Almaty ІІD
ALMATY. QazAqparat - Almaty qalalyq polıtsııasy tramvaıdyń qatysýymen bolǵan apatqa polıtseılerdiń qatysy joqtyǵyn málimdedi. Baspasóz hatshysy Saltanat Ázirbektiń aıtýynsha, apatty jaǵdaıda toqtaǵan tramvaıdy ornynan qozǵaýǵa polıtsııa pármen bergen joq.
Osyny anyqtaý úshin qalalyq ІІD-de tekserý jumystary ótti.
«Tramvaı deposynyń qyzmetkerlerine polıtseı ókilderi joldy bosatý týraly eshqandaı buıryq bermegen. Bul vagon jetekshisiniń sózimen ári jedelbasqarý ortalyǵynyń GPS navıgatsııalyq qurylǵysynyń málimetterimen rastalady. «102» pýltyna alǵashqy dabyl 11:22-de túsken. Onda Shevchenko boıynda júrgizýshisiz tramvaı kele jatyr degen aqparat aıtyldy», - dedi S.Ázirbek.
Ázirge tergeý aldy tekserý jumystary júrip jatyr.
Aıta ketý kerek, qyrkúıektiń 21 kúni júrgizýshisiz qozǵalǵan tramvaı Baıtursynov kóshesinde 14 kólikti soǵyp ketken.
«Almatyelektrotrans» AQ-nyń habarlaýynsha, tótenshe jaǵdaı tramvaıdyń ishinde ot tutanyp, apatty jaǵdaıda toqtaýynyń sebebinen bolǵan. Jolaýshylardy shyǵarǵan soń júrgizýshi tramvaıdaǵy tehnıkalyq aqaýdy qalpyna keltirem degenshe, kólik ornynan ózdiginen qozǵalyp ketken.
