Tramvaı qaǵyp ketken pavlodarlyq oqýshy qyz aýrýhanadan shyqty
PAVLODAR. QazAqparat - Pavlodarda tramvaı qaǵyp ketýinen aman qalǵan 8 jasar Maral Masǵut oblystyq balalar aýrýhanasynan shyqty, dep habarlaıdy «QazAqparat» HAA tilshisi.
«Ony (aýrýhanadan) shyǵardyq. Ony shyǵarýǵa nusqaý boldy, emdelý kýrsynan ótti, - dedi oblystyq balalar aýrýhanasy bas dárigeriniń orynbasary Gúlmıra Támpisheva. - Oǵan bir aı boıy saqtaný rejımi usynylady. Ol uıqy rejımi, sergektik rejımi, tipti, teledıdar kórmeý, gadjet oınamaý rejımi bolýy múmkin. Oǵan qosymsha túrde psıhologtyń keńesterin usynamyz, muny qyzdyń anasy sheshedi. Óıtkeni ol óz qyzyn jaqsy biledi. Dene shynyqtyrý sabaǵynan bosatylady. Bir aı boıy saqtaný rejıminde bolýy tıis. Múmkindiginshe, bıyl ony (sabaqtardan) bosatý qajet shyǵar».
Bir aı boıy Maral úıde dárigerdiń qaraýynda bolady. Qajet bolsa, qyz nevrologqa júgine alady. Qyzdyń sheshesinde dárigerlerge eshqandaı shaǵymy joq.
Eske sala keteıik, 7 qyrkúıek kúni Pavlodarda jan túrshigerlik jol apaty bolyp, eki qyzdy tramvaı qaǵyp ketken bolatyn. Apaly-sińliniń bireýi oqıǵa ornynda ajal qushyp, ekinshisi oblystyq balalar aýrýhanasynyń jan saqtaý bólimine jetkizilgen.
