Tramvaı qaǵyp ketken oqýshynyń otbasyna tasymaldaýshy kompanııa kómek kórsetedi
PAVLODAR. QazAqparat - Tramvaı qaǵyp ketken eki oqýshy qyzdyń otbasyna «Pavlodar tramvaı basqarmasy» AQ tarapynan barlyq qajetti kómek kórsetiledi, dep habarlaıdy «QazAqparat» HAA.
Kompanııanyń qara jamylyp otyrǵan otbasylarǵa kómek kórsetýge daıyn ekendigi týraly tasymaldaý ónerkásip qozǵalysy qyzmetiniń bastyǵy Antonına Rybalko habarlady. «Qaıǵyly jaǵdaı oryn alǵan otbasyǵa kóńil aıtqym keledi. Júrgizýshi bes jyldan beri tramvaı aıdap kelgen, tájirıbeli júrgizýshi. Búgin ol jolǵa shyqpas buryn reısaldy saraptamadan ótti, júrip ketetin kezde jaǵdaıy qalypty bolǵan. Vagonda eshqandaı tehnıkalyq aqaý anyqtalmady», - dedi ol.
A.Rybalkonyń aıtýynsha, «Pavlodar tramvaı basqarmasy» AQ basshylyǵy zardap shekken otbasymen baılanysyp, jol-kólik apaty kezinde aman qalǵan segiz jasar qyzdyń jatqan aýrýhanasyna baryp, týystarymen sóılesken.
«Biz barlyq qajetti kómekti kórsetemiz, - dep atap ótti Antonına Rybalko. - Qazir bizde jınalys bolady. Kezekten tys nusqaýlyq ótkiziledi. Bul jaǵdaı ár tramvaı júrgizýshisine jetkiziledi. Sáıkesinshe, osyndaı jaǵdaı qaıtalanbas úshin barlyq tramvaı júrgizýshileri qaıtadan emtıhan tapsyrýy múmkin. Ol jaqynda ǵana qaıta attestatsııalaýdan ótken edi - bizde jyl saıyn qaıta attestatsııalaý bolyp turady. Ol jol qozǵalysy erejesi boıynsha emtıhandy sátti tapsyryp shyqqan bolatyn. Vagonda eshqandaı aqaý joq, bizde tur. Árıne, ol bizde turǵanymen, ony jelige jibermeımiz».
