Tramptyń ushaǵy apatqa ushyrady
ASTANA. QazAqparat - AQSh prezıdenti Donald Tramptyń jeke ushaǵy Nıý-Iorktegi LaGuardia áýejaıynda basqa ushaqpen soqtyǵysqan. Bul týraly Associated Press habarlady.
Oqıǵa 28 qarasha kúni tańerteń bolǵan. Bul aqparatty Trump Organization rastady. Prezıdenttiń Boeing 757 ushaǵy turaqta turǵan kezde, oǵan Bombardier Global Express ákimshilik ushaǵy soqtyǵysqan. Ushaq Boeing-ti qanatymen ilip ketken.
Oqıǵa saldarynan eshkim zardap shekken joq. Ushaqtyń qalaı zaqymdalǵany ázirge habarlanbady. Áýejaı óz jumysyn shtattyq rejimde jalǵastyryp jatyr.
Tramptyń Boeing 757 ushaǵyn 2011 jyly 100 mln dollarǵa satyp alǵany belgili. Ol bul ushaqty 2016 jyly saılaýaldy naýqanynda belsendi paıdalanǵan bolatyn.
