Tramptyń jarlyǵynan keıin Google Ontarıo kóliniń ataýyn ózgertti
ASTANA. KAZINFORM – Google Maps servısi AQSh Prezıdenti Donald Tramptyń 27 tamyzdaǵy jarlyǵyna sáıkes Ontarıo kóliniń ataýyn amerıkalyq paıdalanýshylar úshin «Amerıka kóli» dep ózgertti, dep habarlaıdy Deutsche Welle.
Ontarıo – AQSh pen Kanada shekarasynda ornalasqan bes Uly kóldiń eń kishisi.
Google kompanııasy kartografııalyq servıstegi geografııalyq ataýlardy resmı memlekettik derekkózderdegi málimetterge sáıkes jańartyp otyratynyn málimdedi. AQSh úshin mundaı derekkóz – Geografııalyq ataýlardyń aqparattyq júıesi (GNIS).
– AQSh-taǵy Google Maps paıdalanýshylary «Amerıka kóli» degen ataýdy kóredi. Kanadada burynǵydaı «Ontarıo kóli» dep kórsetiledi, al basqa elderdegi paıdalanýshylarǵa eki ataý da usynylady, – dep málimdedi Google.
Buǵan deıin Google Maps AQSh aýmaǵyndaǵy paıdalanýshylar úshin Meksıka shyǵanaǵyn da Amerıka shyǵanaǵy dep ózgertken edi. AQSh-tan tys jerlerde jańa ataý dástúrli ataýdan keıin jaqsha ishinde kórsetiledi.
Ontarıo kóliniń ataýyn ózgertý AQSh pen Kanada jańa saýda kelisimi boıynsha ortaq mámilege kele almaǵannan birneshe kún ótken soń júzege asty.
29 tamyzda Kanadanyń Ontarıo provıntsııasynyń premeri Dag Ford kóldiń Kanada jaǵalaýyna aǵylshyn jáne frantsýz tilderinde «Ontarıo kóli: qazir de, árqashan da» degen jazýy bar bılbord ornatty.
– Prezıdent Tramp ony qalaǵanynsha ataı alady. Biraq álemniń qalǵan bóligi bul kóldi árqashan Ontarıo kóli dep ataıtynyna senimdimin, – dedi Dag Ford.
Aıta keteıik, buǵan deıin Tramp Google-ǵa salynǵan aıyppulǵa baılanysty Eýroodaqqa qoqan-loqy jasaǵany habarlandy.
