Tramptyń jappaı deportatsııalaýy 86 mıllıard dollarǵa baǵalandy

ASTANA.KAZINFORM — AQSh shekara qyzmetiniń basshysy Tomas Homan jappaı deportatsııalaýdyń «baǵasy» joq ekenin jáne bul eń birinshi kezekte «ulttyq qaýipsizdikke» qatysty ekenin aıtty, dep habarlaıdy The Hill.

T.Homan 86 mıllıard dollarlyq jappaı deportatsııanyń qunyn qorǵap, bul bolashaqta amerıkalyq salyq tóleýshilerdiń aqshasyn únemdeıtinin aıtty. Onyń aıtýynsha, dál qazir AQSh tegin áýe bıletterine, qonaqúı nómirlerine, medıtsınalyq qyzmetke, tamaq pen bilim berý júıesine mıllıardtaǵan dollar jumsap jatyr.

— Ulttyq qaýipsizdikke qandaı baǵa beresiz? Men onyń baǵasy joq dep oılaımyn. Balalaryn óz qoldarymen jerlegen myńdaǵan amerıkalyq analar men ákelerge qandaı baǵa beresizder? Siz otbasylardyń bólinýi týraly sóz qozǵaǵyńyz keledi, olar balalaryn jerledi, óıtkeni olardyń balalaryn munda turmaýy tıis zańsyz ımmıgranttar óltirdi. Men oǵan baǵa qoımaımyn. Men ulttyq qaýipsizdikke baǵa qoımaımyn. Men amerıkalyqtardyń ómirine baǵa qoımaımyn, — dedi Tomas Homan.

Shekara qyzmetiniń bolashaq basshysy Tramp ákimshiligi otbasylardy bólýdi emes, kerisinshe olardy birge deportatsııalaýdy josparlap otyrǵanyn aıtty. Osylaısha, zańsyz mıgranttardyń balalary AQSh azamattyǵynan aıyrylmaıdy, biraq olar ári qaraı sheshim qabyldaý úshin ońaltý ortalyqtaryna ornalastyrylýy múmkin. AQSh-ta zańsyz júrgen otbasylar jasaı alatyn eń jaqsy nárse — óz betterimen deportatsııalaný.

Aıta ketelik, Donald Tramp jeńiske jetse tarıhta bolmaǵan iri deportatsııa operatsııasyn bastaýǵa ýáde bergen edi. 

Jeńiske jetkennen keıin, prezıdent Donald Tramp AQSh-ta zańsyz júrgenderdiń barlyǵyn, sonyń ishinde amerıkalyq azamattar men olardyń otbasy múshelerin elden shyǵarýǵa daıyn ekenin habarlaǵan bolatynbyz.