Tramptyń jańa tarıf soqqysy: aıfondar men Eýroodaq taýarlary qymbattaýy múmkin

ASTANA.KAZINFORM —  AQSh prezıdenti Donald Tramp Eýroodaq elderinen AQSh-qa jetkiziletin taýarlarǵa 50% kedendik baj salyǵyn engizýdi usyndy. Sonymen qatar, ol eger amerıkalyq Apple kompanııasynyń telefondary AQSh aýmaǵynda óndirilmese, olarǵa da salyq salatynyn eskertti, dep jazdy BBC.

«Olarmen júrgizgen saýda kelissózderimiz esh nátıjesiz!» – dep jazdy Tramp óziniń Truth Social jelisinde.

Onyń aıtýynsha, EO elderinen ákelinetin taýarlarǵa joǵary baj salyǵy 1 maýsymnan bastap engiziledi.

Qazir EO-dan keletin taýarlarǵa salynatyn kedendik salyq mólsheri 10%. Bastapqyda Tramp bul mólsherdi 20% qylýdy usynǵan, biraq keıin kelissózderge múmkindik berý úshin 8 shildege deıin ony 10%-ǵa deıin tómendetken edi.

Aıfondar zardap shegýi múmkin

Juma kúni Tramp aıfondar AQSh aýmaǵynda óndirilýi tıis ekenin taǵy da qaıtalap aıtty.

– Men Apple basshysy Tım Kýkke burynnan aıtyp kelemin: eger AQSh-ta satylatyn aıfondar Amerıkada óndirilmese, onda kompanııa 25% kedendik salyq tóleıtin bolady, – dedi Tramp.

AQSh – Apple kompanııasy úshin eń iri naryqtardyń biri. Counterpoint Research málimeti boıynsha, ótken jyly AQSh-ta satylǵan smartfondardyń jartysy – Apple ónimderi bolǵan.

Sol derekterge súıensek, AQSh-ta satylatyn aıfondardyń shamamen 80%-y Qytaıda, qalǵan 20%-y Úndistanda óndiriledi.

CNBC arnasy habarlaǵandaı, óndiristi AQSh-qa kóshirý aıfon baǵasyn aıtarlyqtaı ósiredi. Sarapshylardyń biri iPhone 16 Pro modeli tek jumys kúshiniń qunyna baılanysty 25% qymbattaıtynyn boljaıdy (qazir ol 1199 dollar turady).

Al Wedbush kompanııasynyń sarapshysy Den Aıvs aıfon baǵasy 3,5 myń dollarǵa deıin kóterilýi múmkin deıdi. Onyń esebinshe, Apple kompanııasy óndiristiń 10%-yn AQSh-qa kóshirý úshin aldaǵy úsh jylda 30 mıllıard dollar jumsaýǵa májbúr bolady.

Sarapshylardyń keıbiri Apple kompanııasyna AQSh-ta qajetti bilikti jumysshylardy tabý ońaı bolmaıtynyn da atap ótti.

– Salanyń sarapshylary men baqylaýshylary bul stsenarıı (aıfon óndirisin AQSh-qa kóshirý) múmkin emes dep sanaıdy, – dep jazady CNBC.

Eske sala keteıik, buǵan deıin Apple kompanııasy iPhone óndirisin Qytaıdan Úndistanǵa shuǵyl kóshirip jatqanyn jazǵan edik.