Tramptyń ulttyq qaýipsizdik jónindegi keńesshisi Maık Ýoltts laýazymynan bosatyldy
ASTANA. KAZINFORM - Ulttyq qaýipsizdik jónindegi keńesshisi Maık Ýoltts pen onyń orynbasary Aleks Vong Tramp ákimshiligindegi laýazymdarynan bosatyldy, dep habarlaıdy Kazinform menshikti tilshisi Fox News-ke silteme jasap.
Prezıdent Donald Tramp bul týraly kópshilik aldynda sóz sóıleıdi jáne basqa da laýazym ıeleri qyzmetimen qosh aıtysýy múmkin.
Ýoltts naýryz aıynda Signal jelisinde chat quryp, oǵan qatelesip «The Atlantic» jýrnalynyń bas redaktory Djeffrı Goldbergti kirgizip jibergen soń synǵa ushyrady. Chatta Iemendegi hýsıt kóterilisshilerine soqqy berý máselesi talqylanǵan bolatyn.
Ýoltts jýrnalısti chatqa engizgeni úshin jaýapkershilikti óz moınyna aldy.
Ýolttstiń otstavkasyn rastaǵan soń Ókilder palatasyndaǵy azshylyqtar lıderi Hakım Djeffrıs Fox News-ke «Ulttyq qaýipsizdik jónindegi keńesshi ketti. Ol birinshi. Ol sońǵysy bolmaýy da múmkin»,-dep jazdy.
Vong keńesshi Ýolttstiń bas orynbasary edi, Signal chatyndaǵy aqparattyń syrtqa shyǵyp ketý oqıǵasy boıynsha oǵan komanda qurý jumysy tapsyrylǵan bolatyn.
Tramp ákimshiligi naýryz aıynda Signal chatynda eshqandaı qupııa materıaldardyń taratylmaǵanyn aıtqan edi. Al Tramp Ýolttsti osy másele boıynsha birneshe márte qorǵap qaldy.
Prezıdent Donald Tramp Truth Social jelisinde AQSh-tyń Birikken Ulttar Uıymyndaǵy kezekti elshisi retinde Maık Ýolttstiń kandıdatýrasyn usynǵan bolatyn.
- Ol Kongreste jáne meniń ulttyq qaýipsizdik jónindegi keńesshim bolǵaly elimizdiń múddesi birinshi orynǵa shyǵýy jolynda tabandy eńbek etti. Ol óziniń jańa qyzmetinde osy isti atqaratynyna senimdimin, -dep jazdy Tramp.
Al Memlekettik hatshy Marko Rýbıo Memlekettik departamenttegi óz qyzmetimen birge ulttyq qaýipsizdik jónindegi keńesshiniń rólin de atqarady.
- Biz Amerıka men álemdi qaýipsiz etý jolynda sharshamaı eńbek etemiz. Osy máselege degen nazarlaryńyz úshin kóp rahmet!, - dedi AQSh prezıdenti.
Osyǵan deıin Tramp Signal chatyndaǵy janjal aıasynda Pentagonǵa qoldaý bildirgeni týraly jazdyq.
Sondaı-aq Tramp Signal daýyna baılanysty sheneýnikterdi jumystan shyǵarmaıtynyn aıtqan bolatyn.