Tramptyń ulttyq qaýipsizdik jónindegi burynǵy keńesshisi Djon Boltonnyń úıinde tintý júrgizildi
ASTANA.KAZINFORM - Tańerteń Tramptyń burynǵy keńesshisi Djon Boltonnyń úıinde tintý júrgizildi. AFP jýrnalısi FTB agentteriniń Merılend shtatyndaǵy Boltonnyń úıine kirgenin kórgen, dep habarlaıdy VVS.
New York Post gazetiniń habarlaýynsha, tintý ulttyq qaýipsizdik boıynsha tergeýdiń bir bóligi jáne FTB dırektory Kesh Pateldiń buıryǵymen jasalǵan.
— Eshkim zańnan joǵary emes. FTB agentteri óz mindetin atqaryp jatyr, — dep jazdy Patel X paraqshasynda.
Jazbany Aq úıdiń resmı akkaýnty qaıta jarııalady. Bul boıynsha ázirge resmı málimdeme jasalǵan joq.
Fox News-tiń habarlaýynsha tergeý taraǵan aqparatqa baılanysty bastaldy. Telearnanyń habarlaýynsha, Bolton qazir qamaýǵa alynǵan joq.
Bolton 2001-2005 jyldary Djordj Býsh tusynda Memlekettik hatshynyń qarýdy baqylaý jáne halyqaralyq qaýipsizdik jónindegi orynbasary, odan keıin 2005-2006 jyldary BUU-daǵy AQSh-tyń turaqty ókili qyzmetin atqarǵan.
Bolton syrtqy saıasatqa qatysty konservatıvti kózqarastarymen jáne Soltústik Koreıa, Iran, Kýba, sondaı-aq Reseı men onyń odaqtastaryna qatysty qatal kózqarasymen tanymal. Ol AQSh-tyń ıadrolyq áleýetin tejeıtin kez kelgen kelisimderge birneshe ret qarsy shyqty.
Ol 2018 jyldyń sáýirinen 2019 jyldyń qyrkúıegine deıin birinshi Tramp ákimshiligi kezinde ulttyq qaýipsizdik boıynsha keńesshi qyzmetin atqardy. Tramp Boltondy syrtqy saıasatqa degen kózqarasy bir-birinen qatty alshaq bolǵandyqtan jumystan shyǵardy dep málimdeıdi. Boltonnyń qyzmetinen óz erkimen ketkenin alǵa tartady. Bılikten ketkennen keıin Bolton Trampty eldiń syrtqy saıasatyn óziniń taktıkalyq saıası múddelerine baǵyndyrdy dep synaǵan kitap ta jazdy.
AQSh prezıdenti Donald Tramp óziniń ulttyq qaýipsizdik jónindegi burynǵy keńesshisin tintý týraly suraqqa ol «Djon Boltonnyń jankúıeri emes» dep jaýap berdi.
— Ol patrıot emes bolýy múmkin. Biz ony anyqtaımyz, — dep qosty Tramp.
Prezıdent tintý týraly eshteńe bilmeıtinin, bul týraly búgin tańerteń estigenin aıtty. Sonymen birge Tramp «qajet bolmasa» bul týraly eshteńe bilgisi kelmeıtinin aıtty.