Tramptyń Ýkraınadaǵy beıbitshilik jospary Florıda men Parıjde talqylanady

ASTANA. KAZINFORM — Búgin Florıdada AQSh pen Ýkraına delegatsııalarynyń kezdesýi ótedi. Sonan soń Ýkraına prezıdenti Vladımır Zelenskıı Frantsııaǵa barady, dep habarlaıdy VVS.

AQSh Memlekettik hatshysy Marko Rýbıo men Donald Tramptyń arnaıy ókili Stıven Ýıtkoff Florıdada Ýkraına delegatsııasymen kezdesedi. Oǵan Tramptyń kúıeý balasy Djared Kýshner de qatysady.

Sondaı-aq Ýkraına prezıdenti Vladımır Zelenskıı aldaǵy dúısenbide Parıjge barady. Bul sapar týraly Ulttyq qaýipsizdik jáne qorǵanys keńesiniń tóraǵasy Rústem Ýmerov bastaǵan Ýkraına delegatsııasynyń AQSh-qa barǵany kezinde jarııalandy, dep habarlaıdy Euronews.

Vladımır Zelenskııdi Frantsııa prezıdenti Emmanýel Makron qabyldap, «Jeneva kelissózderiniń nátıjeleri boıynsha ádil jáne berik beıbitshiliktiń jaǵdaıy men sharttaryn» talqylaıdy.

Jospar boıynsha amerıkalyq ókilder Máskeýge kelesi aptanyń sońynda barady.

Aıta keteıik, Tramptyń Ýkraınadaǵy beıbitshilik josparynyń barlyq 28 tarmaǵy jarııalandy.

Buǵan deıin Erdoǵan Ystanbulda Reseı men Ýkraına kelissózin qaıta bastaýǵa shaqyrdy. Bul týraly Túrkııa prezıdenti Ankarada ýkraınalyq áriptesi Vladımır Zelenskıımen birlesken baspasóz máslıhatynda málimdedi.

Ótken aptada Shveıtsarııada Ýkraına boıynsha kelissóz aıaqtaldy. Jenevada ótken kelissózderden keıin AQSh Memlekettik hatshysy Marko Rýbıo Ýkraına sheneýnikterimen soǵysty toqtatý josparyn talqylaýda «aıtarlyqtaı ilgerileýshilik» bolǵanyn málimdedi.