Tramptyń týǵan kúninde AQSh-ta aýqymdy áskerı parad ótedi

ASTANA. KAZINFORM — 14 maýsymda AQSh prezıdenti Donald Tramptyń týǵan kúninde armııanyń mereıtoıy qurmetine ótkiziletin parad 45 mln dollarǵa túsýi múmkin, dep habarlaıdy CBS News. 

Atalǵan shara 14 maýsymda AQSh armııasynyń 250 jyldyǵyn toılaý aıasynda ótedi, ol prezıdent Tramptyń 79-shy týǵan kúnimen tuspa-tus keledi jáne oǵan 25 mln-nan 45 mln dollarǵa deıin qarajat jumsalady dep boljanyp otyr. 

Vashıngtonda Kolýmbııa okrýginde paradqa 100-den astam kólik pen myńdaǵan sarbaz, sondaı-aq Azamattyq avıatsııanyń federaldyq basqarmasymen «keńirek úılestirýdi» qajet etetin 50 tikushaq qatysady dep kútilip otyr. 

— Prezıdent Tramp AQSh armııasynyń týǵan kúnin 250 jyl buryn uly elimiz qurylǵannan beri qyzmet etkenderdiń barlyǵyna qurmet kórsetetin áskerı paradpen atap ótedi, — dedi Aq úıdiń baspasóz ókili Anna Kellı.

Tramp bul josparlaryn osy aıdyń basynda rastady.

— Bizde úlken, ádemi parad ótedi, — dedi prezıdent NBC arnasynyń «Baspasózben kezdesý» baǵdarlamasynda.

Prezıdent sondaı-aq bul shara onyń týǵan kúnine baılanysty emes ekenin aıtty. Baǵa týraly saýalǵa Tramp bul «oqıǵanyń qunymen salystyrǵanda az aqsha» bolatynyn habarlady.

— Bizde álemdegi eń jaqsy zymyrandar bar. Álemdegi eń jaqsy sýasty qaıyqtary bizde. Álemdegi eń jaqsy tankter bizde. Bizde álemdegi eń jaqsy qarý bar. Biz osyny toılaımyz, — dedi Donald Tramp NBC News-ke bergen suhbatynda.

Bul josparlar demokrattar tarapynan biraz synǵa ushyrady. Osy aıdyń basynda Tennessı ókili Stıv Koen jospardy ysyrap dep atady jáne málimdemesinde: «Bas egoıst salyq tóleýshilerden onyń týǵan kúninde áskerı parad úshin aqsha tóleýin qalaıdy» dep jazdy.

Tramptyń áskerı sherýlerge degen qyzyǵýshylyǵy kóp jyl buryn bastaý alady. Óziniń birinshi merziminde 2017 jyly Frantsııaǵa sapary kezinde prezıdent Bastılııany alý kúnine arnalǵan jyl saıynǵy sherýdi joǵary baǵalap, 4 shildede (AQSh Táýelsizdigi kúni — red.) «biz odan asyp túsýimiz kerek» dep usyndy.

Bir jyldan keıin ákimshilik Ardagerler kúnine arnalǵan sherýdi josparlaýdy bastady, biraq is-sharanyń 92 mln dollarlyq quny anyqtalyp, demokrattardyń synynan keıin sherý keıinge qaldyryldy.

Buǵan deıin demokrattar ushaqty syılyq retinde qabyldaǵan Trampty synǵa aldy.