Tramptyń Truth Social jazbalaryn monetızatsııalaýyna baılanysty sotqa shaǵym tústi
ASTANA. KAZINFORM — The Intercept jáne Freedom of the Press Foundation kommertsııalyq emes uıymy Trampqa qarsy sotqa talap aryz túsirdi. Olar AQSh prezıdentiniń Truth Social áleýmettik jelisindegi jazbalaryna aldyn ala qoljetimdilikti qamtamasyz etetin aqyly Truth API qyzmetiniń jumysyn toqtatýdy talap etip otyr, dep habarlaıdy DW.
Amerıkalyq The Intercept jańalyqtar basylymy men Freedom of the Press Foundation (FPF) kommertsııalyq emes uıymy AQSh prezıdenti Donald Trampqa qarsy sotqa shaǵym túsirdi. CNBC habarlaýynsha, talapkerler Aq úı basshysynyń Truth Social áleýmettik jelisindegi jazbalaryna aldyn ala qoljetimdilikti qamtamasyz etetin aqyly Truth API qyzmetiniń jumysyn toqtatýdy talap etip otyr. Talapta Truth API qyzmeti AQSh Konstıtýtsııasyndaǵy Birinshi jáne Besinshi túzetýlerdi buzatyny, ol jazylýshylarǵa — «negizsiz somaǵa» Tramptyń jarııa málimdemeleri, sondaı-aq vıtse-prezıdent Dj. D. Vens pen FTB dırektory Kesh Patel sııaqty basqa da joǵary laýazymdy tulǵalardyń jazbalaryna aldyn ala qoljetimdilik beretini aıtylǵan.
— Bul — erekshe sıpattaǵy, sybaılas jemqorlyqqa negizdelgen jáne Konstıtýtsııaǵa qaıshy keletin shema, talapkerler ony toqtatý maqsatynda sotqa shaǵym túsirip otyr, — dep málimdedi The Intercept pen FPF.
Talapkerler atap ótkendeı, 2025 jyldyń qańtarynda Aq úıge qaıta oralǵannan beri Tramp Truth Social-da 9 myńnan 11 myńǵa deıin jazba jarııalaǵan.
— Onyń keıbir jazbalaryna Aq úı tarapynan dereý ári tıisti málimdeme qosa berilgen joq. Basqasha aıtqanda, prezıdent Tramptyń jazbalary — úkimettiń resmı jańalyqtaryn alýdyń jalǵyz joly, — dep atap ótti olar.
Tramp Truth Social jelisindegi jazbalaryn aqshaǵa aınaldyryp otyr
Truth Social-dyń bas kompanııasy — Trump Media & Technology Group (TMTG) Truth API qyzmetin shilde aıynyń sońynda iske qosty. Oǵan jazylý aıyna 100 myń dollarǵa deıin somaǵa satylǵan. Jazylýshylar Tramp pen onyń seriktesteriniń jańa jazbalaryna qarapaıym paıdalanýshylarǵa qaraǵanda áldeqaıda jyldam — mıllısekýnd ishinde qol jetkize alatyny habarlandy.
Jaqynda TMTG bas dırektorynyń mindetin atqarýshy Kevın MakGern Truth API qyzmetine qazirdiń ózinde 10-nan astam adam jazylǵanyn málimdedi, olardyń qatarynda negizinen qor bırjalary men qarjy naryqtaryndaǵy joǵary jyldamdyqty saýda operatsııalaryna mamandanǵan kompanııalar bar. MakGern sondaı-aq basqa áleýetti klıenttermen, sonyń ishinde jasandy ıntellekt salasyndaǵy kompanııalarmen kelissóz júrgizilip jatqanyn qosyp ótti.
Tramp Truth Social arqyly qor naryqtaryna aıtarlyqtaı áser etetin sheshimderdi jarııalap otyrady. Sol sebepti onyń jazbalaryna erterek qol jetkizý treıderlerge qomaqty tabys ákelýi múmkin. AQSh Prezıdentiniń ózi TMTG kompanııasynyń eń iri aktsıoneri ekenin eskergende, Truth API-diń iske qosylýy Tramptyń óz qyzmetin jeke kommertsııalyq maqsatta paıdalanyp jatqan-jatpaǵanyna qatysty kúrdeli suraqtar týyndatyp otyr.
Osyǵan deıin AQSh soty Aq úı mańyndaǵy bal zalynyń qurylysyn toqtatqanyn habarladyq.
