Tramptyń tarıftik saıasaty AQSh-qa 50 mlrd dollardan astam qosymsha kiris ákeldi

ASTANA. KAZINFORM – AQSh prezıdenti Donald Tramptyń agressıvti tarıftik strategııasy el bıýdjetine 50 mlrd dollar kóleminde qosymsha kedendik túsim túsirdi.

AQSh Qarjy mınıstrliginiń derekterine sáıkes, 2025 jyldyń ekinshi toqsanynda kedendik túsimder 64 mlrd dollarǵa jetip, ótken jyldyń sáıkes kezeńimen salystyrǵanda 47 mlrd dollarǵa artqan. Bul kórsetkish el tarıhyndaǵy rekordtyq deńgeı bolyp otyr. Bul týraly Financial Times (FT) basylymy habarlady.

Saýda soǵysynyń ýshyǵýynan beri ótken tórt aı ishinde tek Qytaı men Kanada Tramp engizgen jahandyq baj salyǵyna eleýli qarsy sharalar qabyldady.

Al álemdegi eń iri saýda blogy — Eýropalyq odaq qarsy baj salyǵyn ázirlegenimen, ony engizýdi keıinge shegerip otyr. Brıýssel 1 tamyzǵa deıin Vashıngtonmen saýda kelisimine kelýge nıetti.

Keı sarapshylardyń pikirinshe, qarsy sharalardyń bolmaýy Tramptyń ustanymyn nyǵaıta túsken. Prezıdent kedendik kiristi óziniń saýdadaǵy qatań saıasatynyń nátıjesi retinde kórsetýde. Onyń odaqtastary bul saıasat ózge elderdi kelissóz ústeline ákelýge yqpal etti dep esepteıdi.

Degenmen sarapshylardyń bir bóligi bul saıasattyń álemdik saýda men dıplomatııalyq qarym-qatynasqa uzaq merzimdi keri áseri bolýy múmkin ekenin eskertýde.

Buǵan deıin Tramp 150-den astam elden keletin ımportqa 10–15% kóleminde jańa baj salyǵyn engizý josparyn jarııalaǵan bolatyn.