Tramptyń tarıfteri: álemdegi eń baı adamdar 24 saǵatta 208 mlrd dollardan aıyryldy

ASTANA. KAZINFORM — Bloomberg málimetinshe, AQSh prezıdenti Donald Tramp jańa kedendik baj salyǵyn engizetinin jarııalaǵannan keıin bir kúnde ǵalamshardaǵy eń baı 500 adamnyń jalpy baılyǵy 208 mlrd dollarǵa qysqardy, dep habarlaıdy TASS.

Tramp málimdemesi álemdik qarjy naryqtaryn quldyraýǵa ákelip, ındeksti sońǵy 13 jyldaǵy jáne COVID-19 pandemııasynyń bastalýynan bergi tórtinshi eń úlken bir kúndik quldyraýǵa ákeldi. Tizimge qatysýshylardyń jartysynan kóbi shyǵynǵa ushyrap, ortasha eseppen óz kapıtalynyń 3,3%-ǵa jýyǵynan aıyryldy. 

Ásirese amerıkalyq kásipkerler qatty zardap shekti. Meta kompanııasynyń bas dırektory Mark Tsýkerbergtiń baılyǵy kompanııa aktsııalary 9%-ǵa tómendegennen keıin 17,9 mlrd dollarǵa qysqardy. Amazon negizin qalaýshy Djeff Bezos dál osyndaı sebeppen 15,9 mlrd dollar joǵaltty. Tesla bas dırektory Ilon Mask 11 mlrd dollarynan aıyryldy, sebebi onyń kompanııasynyń aktsııalary 5,5%-ǵa arzandaǵan. 

Keıbir mıllıarder zardaptardan qutyla aldy. Atap aıtqanda, meksıkalyq kásipker Karlos Slım jańa tarıfterdiń aıtarlyqtaı áserin sezingen joq. 

Eske sala ketsek, prezıdent Donald Tramp AQSh-tyń barlyq saýda seriktesi úshin 10% tarıfti jáne óziniń «Amerıka birinshi kezekte» atty baǵdarlamasy aıasynda ózge ondaǵan memleketke barlyq salany qamtıtyn joǵary baj salyǵyn engizýdi qarastyratyn paketin usyndy. 

Álem kóshbasshylary Tramp engizgen tarıfterge qalaı qaraıtynyn jazǵan bolatynbyz. 

Munaı baǵasy Tramptyń jańa tarıfteri jáne OPEK+ sheshimderi aıasynda tómendedi. 

Aqparatty Kazinform agenttigine arnaıy TASS seriktes agenttigi usyndy.