Tramptyń saýda saıasaty qaıta jandandy: AQSh soty tarıfterdi qoldady

ASTANA. KAZINFORM — AQSh-tyń federaldy apellıatsııalyq soty prezıdent Donald Tramptyń sheteldik ımportqa engizgen kedendik baj salyǵyn qaıta qalpyna keltirdi. Bul salyq buǵan deıin Halyqaralyq saýda jónindegi sot sheshimimen zańsyz dep tanylyp, toqtatylǵan bolatyn, dep jazdy Euronews saıty.

Sot eki tarapqa da jazbasha dálelder usynýdy tapsyrdy: talapkerler – 5 maýsymǵa deıin, Tramp ákimshiligi – 9 maýsymǵa deıin. Buǵan deıin sot prezıdenttiń óz ókilettigin asyra paıdalanyp, Kongress quzyryndaǵy saýda saıasatyna aralasqanyn aıtqan.

AQSh-tyń Halyqaralyq saýda federaldyq soty amerıkandyq prezıdent óz ókilettikterin shekten tys asyrdy ári álemniń kóptegen elderindegi baj salyǵy zańsyz dep taýyp, jańa tarıfterdiń kópshiligine tosqaýyl qoıdy.

Onyń úkimine sáıkes, Donald Tramp sanktsııalardy ulǵaıtý kezinde keltirgen «Halyqaralyq tótenshe ekonomıkalyq ókilettikter týraly» zań memleket basshysyna tarıfter engizýge múmkindik bermeıdi, óıtkeni Konstıtýtsııaǵa sáıkes, basqa eldermen saýdany retteýge prezıdent emes, Kongress aıryqsha ókilettikke ıe.

Talap aryz Liberty Justice Center atty kommertsııalyq emes zań uıymy arqyly, baj salyǵy áser etken shaǵyn bıznes ıeleriniń atynan berildi. Tramp ákimshiligi sot sheshimine birden shaǵym túsirdi.

Buǵan deıin habarlanǵandaı, Tramp EO tarıfterin 9 shildege deıin shegerdi.