Tramptyń reıtıngi rekordtyq mınımýmǵa deıin tómendedi

ASTANA. KAZINFORM — AQSh prezıdenti Donald Tramptyń tanymaldyǵy 2025 jylǵy 20 qańtardaǵy ınaýgýratsııasynan bergi eń tómen kórsetkishke tústi, dep habarlaıdy Reuters.

Tramptyń tómen reıtıngteri 14–17 qarasha aralyǵynda aqparattyq agenttik pen Ipsos halyqaralyq qyzmeti birlesip júrgizgen saýalnama nátıjeleri boıynsha anyqtaldy.

Saýalnamaǵa qatysqan respondentterdiń 38%-y Tramptyń Aq úı basshysy retindegi qyzmetin maquldaǵan. 60% qarsy pikir bildirgen.

Bul — Tramp úshin eń tómen kórsetkish. Qańtar aıynda onyń reıtıngi 47% bolǵan jáne sodan beri 40%-dan tómendemegen. Qarashanyń basynda júrgizilgen sońǵy saýalnamamen salystyrǵanda, Tramptyń tanymaldyǵy 2%-ǵa azaıǵan.

Zertteýshilerdiń aıtýynsha, respondentter eldegi baǵanyń ósýine jáne kámeletke tolmaǵandardy azǵyndyqqa tartty dep aıyptalǵan qarjyger Djeffrı Epshteın isin tergeý barysyna kóńil tolmaýshylyq bildirgen.

Buǵan deıin habarlanǵandaı, qazan aıynda AQSh-ta Tramptyń tanymaldyǵy rekordtyq mınımýmǵa túsken — amerıkalyqtar onyń eldegi ómir súrý qunyna áser etetin sheshimderine narazy bolǵan. Ol kezde amerıkalyqtardyń tek 40%-y qazirgi prezıdenttiń qyzmetin maquldaǵan. Al qyzmetin múlde quptamaıtyndar úlesi 57%-ǵa deıin ósken.

Osydan buryn AQSh prezıdenti Donald Tramp esirtki kartelderimen kúresý úshin Meksıkaǵa yqtımal coqqy jasaýǵa nemese amerıkalyq áskerlerdi jiberýge qarsy emes ekenin málimdedi.