Tramptyń Maıamıdegi záýlim ǵımaraty: prezıdenttik kitaphana qandaı bolady

ASTANA. KAZINFORM – AQSh prezıdenti Donald Tramp Maıamı qalasynyń ortalyǵynda salynatyn bolashaq prezıdenttik kitaphanasynyń alǵashqy eskızderin usyndy, dep habarlaıdy NBC.

Qurylys shatyrynda «ıne», qasbetinde tegi altynmen jazylǵan jáne birinshi qabatta Boeing 747 ushaǵy (Qatar úkimetiniń syılyǵy) turǵan shyny záýlim ǵımarattan turady. 

Jobaǵa Tramptyń prezıdenttik kezeńindegi ınterer kóshirmeleri kiredi: Sopaqsha kabınet, «Prezıdenttik dańq alleıasy» bar Batys kolonnada jáne bal zaly.

Jobany Bermello Ajamil sáýlet jáne ınjenerlik fırmasy ázirleıdi. Quny 67 mln dollardan asatyn ýchaske qalanyń jaǵalaýynda, Trump National Doral kýrortynyń mańynda ornalasqan.

Buǵan deıin federaldy sot osy jerdi jergilikti kolledjden shtatqa berýdi toqtatty, biraq jeltoqsanda sot talap aryzdy qanaǵattandyrmaı, jobany jalǵastyrýǵa ruqsat berdi. 

Tramp kitaphanany Florıdada turatyn kýbalyq qaýymdastyq úshin mańyzdy eskertkish – Bostandyq munarasynan asyp túsip, qalanyń jańa sımvolyna aınaldyrýdy kózdep otyr. 

Truth Social-daǵy jazbasynda Tramp Prezıdenttik kitaphana qoryna onyń qurylysyn qoldaý úshin qaıyrymdylyq jasaýǵa silteme jarııalady. 

Osyǵan deıin Florıdada Palm-Bıch halyqaralyq áýejaıyn Donald Tramptyń atyna berý týraly zań jobasy maquldanǵanyn jazdyq.