Tramptyń málimdemelerinen keıin Brent munaıy shamamen 7% qymbattady
ASTANA. KAZINFORM — AQSh prezıdenti Donald Tramptyń Iran men Iemendegi hýsıtterge qarsy yqtımal áskerı is-qımyldar týraly málimdemelerinen keıin munaı baǵasy kúrt ósti.
Brent markaly munaıdyń baǵasy 6,6% kóterilip, barreli 89,70 dollarǵa jetti. Al amerıkalyq WTI markaly munaıdyń quny 7%-dan astam qymbattap, barreli 84,48 dollar boldy.
Munaıdyń kúrt qymbattaýyna álemdik jetkizilimniń turaqtylyǵyna qatysty alańdaýshylyq sebep boldy. Ásirese, hýsıtterdiń shabýyldaryna baılanysty Qyzyl teńizdegi jaǵdaıdyń ýshyǵýy jáne Ormýz buǵazy tóńiregindegi geosaıası táýekelderdiń kúsheıýi álemdik naryqta munaı tapshylyǵy týyndaýy múmkin degen qaýiptiń artýyna áser etti.
Naryqtaǵy belgisizdikti kúsheıtken taǵy bir jaıt — AQSh Federaldyq rezerv júıesiniń paıyzdyq mólsherlemege qatysty aldaǵy sheshimi. Sebebi nesıe qunynyń ózgerýi jahandyq ekonomıkanyń ósý qarqynyna yqpal etedi, al bul óz kezeginde munaı men basqa da energııa resýrstaryna degen álemdik suranysqa tikeleı áser etedi.
Eske salaıyq, buǵan deıin AQSh pen Iran arasyndaǵy kelissózder men Vashıngtonnyń jaǵdaıdy shıelenistirmeýge degen umtylysy týraly málimdemesinen keıin álemdik munaı baǵasy kúrt tómendegenin habarlaǵanbyz.
Al onyń aldynda Hýsıtter Saýd Arabııasynyń munaı nysandaryna soqqy jasaǵanyn jazǵanbyz.
